مەملەكەت باسشىسى YTO Express باسقارما ءتوراعاسى يۋي حۋەيجياودى قابىلدادى
استانا. KAZINFORM - پرەزيدەنت قاسىم-جومارت توقايەۆ YTO Express باسقارما ءتوراعاسى يۋي حۋەيجياودى قابىلدادى.
كەزدەسۋ بارىسىندا مەملەكەت باسشىسىنا «قازپوشتا» ا ق جانە YTO Express كومپانياسىنىڭ بىرلەسكەن كاسىپورنى «Qazpost-YTO» ج ش س-نىڭ قىزمەتى جونىندە مالىمەت بەرىلدى.
بۇل جوبانىڭ نەگىزگى ماقساتى - قازاقستان مەن ورتالىق ازيا ەلدەرى اۋماعىندا زاماناۋي ءارى ءتيىمدى كۋرەرلىك جەلىنى دامىتۋ.
بيىل الماتى وبلىسىندا سۇرىپتاۋ حابىنىڭ قۇرىلىسىن باستاۋ جوسپارلانىپ وتىر. اتالعان نىسان پوشتا جونەلتىلىمدەرىن جەتكىزۋ مەرزىمىن ەداۋىر قىسقارتۋعا مۇمكىندىك بەرەدى. سونىمەن قاتار «Qazpost - YTO» ج ش س سۇرىپتاۋ حابىنا جاقىن ماڭنان يندۋستريالدى پارك سالۋعا نيەتتى.
كەزدەسۋ سوڭىندا پرەزيدەنت وسىنداي بىرلەسكەن جوبالاردىڭ ستراتەگيالىق ماڭىزىن اتاپ ءوتىپ، ولار مەملەكەتتەر مەن حالىقارالىق بيزنەس اراسىنداعى ءتيىمدى ىقپالداستىقتىڭ ۇلگىسى بولۋعا ءتيىس ەكەنىنە نازار اۋداردى.
