مەملەكەت باسشىسى: وتاندىق ونەركاسىپ ءۇشىن مامان دايارلاۋ ءىسى - وتە وزەكتى ماسەلە
استانا. KAZINFORM - پرەزيدەنت اقوردادا ءوتىپ جاتقان عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا ءوتاندىو ونەركاسىپ ءۇشىن بىلىكتى مامانداردى دايارلاۋ ماسەلەسىن ءسوز ەتتى.
«ءىرى وندىرىستىك كومپانيالارمەن بىرگە «يندۋستريالدى PhD» دايارلاۋ مەحانيزمىن ازىرلەپ، قولدانىسقا ەنگىزگەن ءجون. تاجىريبەلىك-كونسترۋكتورلىق جۇمىستار مەن عىلىمي زەرتتەۋلەر ءوزارا بايلانىسا وتىرىپ، وندىرىسكە يننوۆاتسيالىق شەشىمدەردى ەنگىزۋگە ىقپال ەتەدى. جالپى، ەلىمىزدىڭ جەتەكشى جوعارى وقۋ ورىندارى مەن شەتەلدىك ۋنيۆەرسيتەتتەردىڭ فيليالدارى ەكونوميكامىزدىڭ باسىم سالالارى ءۇشىن عالىمدار مەن بىلىكتى مامانداردى جەدەل دايارلاۋعا ءتيىس. مىسالى «جاسىل» ەنەرگەتيكا، كليماتتىڭ وزگەرۋى، سۋ رەسۋرستارىن ۇنەمدەۋ سالالارىنداعى كادرلارعا سۇرانىس ايتارلىقتاي ارتىپ كەلەدى. وتاندىق ونەركاسىپ ءۇشىن مامان دايارلاۋ ءىسى - وتە وزەكتى ماسەلە. عىلىم جانە جوعارى ءبىلىم مينيسترلىگىنە حالىقارالىق ستاندارتتار مەن تاجىريبەنى ەسكەرىپ، ينجەنەرلىك- تەحنيكالىق كادرلاردى دايارلاۋدىڭ ۇلتتىق مودەلىن ازىرلەۋدى تاپسىرامىن. بۇعان قوسا وڭىرلىك جوعارى وقۋ ورىندارىنىڭ بازاسىندا وزىق ينجەنەرلىك مەكتەپتەر اشۋ قاجەت. بۇل مەكتەپتەردەگى ءبىلىم بەرۋ باعدارلامالارى مەن تەحنولوگيالىق جوبالار ونەركاسىپتىڭ باسىم سالالارىنداعى سۇرانىسقا نەگىزدەلۋى كەرەك. ءبىلىم سالاسى مەن ەڭبەك نارىعىن ۇشتاستىرۋعا ىقپال ەتەتىن «مەنىڭ ماماندىعىم - مەنىڭ بولاشاعىم» جوباسى جاقسى ناتيجە كورسەتىپ وتىر. جوبا اياسىندا ماماندىقتار اتلاسى ازىرلەنىپ، ەكونوميكانىڭ قۇرىلىمى مەن ءار ايماقتىڭ دامۋ تەندەنتسياسى زەرتتەلۋدە. كەلەشەكتە ءار ءوڭىردىڭ بەلگىلى ءبىر سالاعا ماماندانۋىن كورسەتەتىن وڭىرلىك ەكونوميكا اتلاسىن دايىنداۋ ماسەلەسىن پىسىقتاۋ كەرەك. مۇنىڭ ءبارى ءبىلىم بەرۋ باعدارلامالارىن ۋاقىتىلى جاڭارتۋعا مۇمكىندىك بەرەدى. نەگىزگى مىندەت - وڭىرلىك جوعارى وقۋ ورىندارىن كادرلاردى الدىن الا دايارلايتىن جانە قولدانبالى عىلىمي-زەرتتەۋ جۇمىستارىن جۇرگىزەتىن ورتالىققا اينالدىرۋ»، - دەدى پرەزيدەنت.
ەسكە سالا كەتەيىك، بۇعان دەيىن مەملەكەت باسشىسى عىلىممەن اينالىسىپ جۇرگەن جاستاردىڭ سانى كوبەيىپ كەلە جاتقانىن ايتقان بولاتىن.
