مەملەكەت باسشىسى ترانسفەرتتىك باعا بەلگىلەۋ جونىندەگى قۇجاتقا قول قويدى

اقوردا
فوتو: اقوردا

استانا. KAZIFORM - مەملەكەت باسشىسى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ترانسفەرتتىك باعا بەلگىلەۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭىنا قول قويدى.

بۇل تۋرالى اقوردانىڭ باسپا ءسوز قىزمەتى حابارلادى.

زاڭ حالىقارالىق ىسكەرلىك وپەراتسيالاردا جانە وسىعان قاتىستى مامىلەلەردە ترانسفەرتتىك باعا بەلگىلەۋ ءىسىن جەتىلدىرۋگە باعىتتالعان.

زاڭدا نارىق باعاسىن ايقىنداۋ تەتىكتەرى قايتا قارالىپ، تاۋار بيرجالارىنداعى ترانسفەرتتىك باعا بەلگىلەۋ ماسەلەسىنە باقىلاۋ ەنگىزىلدى. سونداي-اق مامىلەگە قاتىسۋشى تاراپتاردى ءوزارا بايلانىستى دەپ تانۋ كريتەرييلەرى كەڭەيتىلدى جانە ءوزارا بايلانىستى رەزيدەنت ەمەس تۇلعالارمەن مامىلەلەرگە قاتىسۋشىلار ءۇشىن جەرگىلىكتى ەسەپتىلىكتى ۇسىنۋ مىندەتتەمەسى ەنگىزىلدى.

اتالعان تۇزەتۋلەر مەن تولىقتىرۋلار نارىقتاعى ءادىل باعانى ايقىنداۋ جانە مەملەكەتتىك بيۋدجەتكە تۇسەتىن قارجىنىڭ جوعالىپ كەتۋىنە جول بەرمەۋ ءۇشىن جاسالىپ وتىر. سونىمەن قاتار زاڭ ترانسفەرتتىك باعا بەلگىلەۋ ماسەلەلەرى بويىنشا باقىلاۋ جۇرگىزۋ كەزىندە تەكسەرۋشى ورگاندار مەن سالىق تولەۋشىلەردىڭ اكىمشىلىك شىعىندارىن ازايتۋدى كوزدەيدى.

سوڭعى جاڭالىقتار