مەملەكەت باسشىسى سانكت- پەتەربۋرگ قالاسىنداعى ءبىرقاتار مادەني نىسانعا باردى
قاسىم-جومارت توقايەۆ رەسەي فەدەراتسياسىنا جۇمىس ساپارى بارىسىندا رەسەي پرەزيدەنتى ۆلاديمير پۋتين، ازەربايجان پرەزيدەنتى يلحام اليەۆ، ارمەنيا پرەمەر- ءمينيسترى نيكول پاشينيان، بەلارۋس پرەزيدەنتى الەكساندر لۋكاشەنكو، قىرعىزستان پرەزيدەنتى سادىر جاپاروۆ، تاجىكستان پرەزيدەنتى ەمومالي راحمون، تۇرىكمەنستان پرەزيدەنتى سەردار بەردىمۇحامەدوۆ جانە وزبەكستان پرەزيدەنتى شاۆكات ميرزيەيەۆپەن بىرگە سانكت- پەتەربۋرگ قالاسىنداعى مادەني نىسانداردى ارالاپ كوردى، دەپ حابارلايدى اقوردا.
ت م د مەملەكەتتەرى باسشىلارىنىڭ بىرلەسكەن ەكسكۋرسياسى «پاۆلوۆسك» مەملەكەتتىك مۋزەي-قورىعىنان باستالدى. مۇندا ولار پاۆلوۆ سارايىنىڭ زالدارى مەن ەكسپوزيتسيالارىن تاماشالادى. قوناقتاردىڭ قۇرمەتىنە سارايداعى «گرەك زالى» امفيتەاترىندا «سيەۆەرنايا سيمفونيا» كونتسەرتى ۇيىمداستىرىلدى.
مۋزەي- قورىق — XVIII عاسىردىڭ سوڭىنداعى ورىس ساۋلەت ونەرىنىڭ بىرەگەي ۇلگىسى. پاۆلوۆ سارايى ارحيتەكتۋرالىق ءانسامبلدىڭ ەڭ باستى كورنەكتى بولىگى سانالادى. بۇل مادەني مۇرا يۋنەسكو- نىڭ قورعاۋىنا الىنعان.
سودان كەيىن مەملەكەتتەر باسشىلارى «تسارسكوە سەلو» مۋزەي-قورىعىن جانە ەكاتەرينا سارايىنىڭ زالدارىن ارالاپ كوردى.
«سارسكوە سەلو» ساراي- ساياباق ءانسامبلى —XX عاسىردىڭ باسىنداعى الەمدىك ساۋلەت جانە باعباندىق ونەردى ايشىقتايتىن ەسكەرتكىش.
ورىس يمپەراتورلارىنىڭ بۇرىنعى جازعى رەزيدەنتسياسى - رەسەيدەگى حالىق كوپ باراتىن مۋزەيلەردىڭ ءبىرى.
مۇراجايعا 2022 -جىلى 2,9 ميلليون ادام كەلگەن. كەشەننىڭ نەگىزىگى نىسانى سانالاتىن ەكاتەرينا سارايىندا الەمگە ايگىلى يانتار بولمەسى ورنالاسقان.
پرەزيدەنتتەردىڭ ءۇشىنشى ەكسكۋرسياسى «پەتەرگوف» مەملەكەتتىك مۋزەي- قورىعىنىڭ ۇلكەن پەتەرگوف سارايىندا جالعاستى.
دەلەگاتسيا باسشىلارى ساندىك- قولدانبالى ونەر بۇيىمدارى، ءمۇسىن جانە كەسكىندەمە ونەرىنىڭ تۋىندىلارى مەن جيھازدار قويىلعان بىرەگەي ساۋلەت ەسكەرتكىشىن تاماشالادى.
پەتەرگوف مۋزەي-قورىعى 33 مۋزەيدەن، 414 گەكتار اۋماقتى الىپ جاتقان ساياباقتار مەن باقتاردان جانە 150 دەن استام سۋبۇرقاقتان تۇرادى.
سورعى ستانتسيالارىنىڭ جوقتىعى سۋبۇرقاق جۇيەسىنىڭ تاريحي جانە مادەني ەسكەرتكىش رەتىندەگى بىرەگەيلىگى سانالادى.
ينجەنەرلىك شەشىمنىڭ ارقاسىندا سۋ 300 جىل بۇرىنعىداي بيىكتىك پەن ءارتۇرلى دەڭگەيدەگى سۋبۇرقاقتار اراسىنان تابيعي تۇردە قۇلاي اعىپ جاتىر.
سوندىقتان پەتەرگوف سۋبۇرقاقتارى ءساۋىردىڭ اياعىنان قازان ايىنىڭ ورتاسىنا دەيىن كۇن سايىن تاڭەرتەڭنەن كەشكە دەيىن جۇمىس ىستەيدى.
