مەملەكەت باسشىسى ساۋد ارابياسىنىڭ تاق مۇراگەرىنە قۇتتىقتاۋ جەدەلحاتىن جولدادى
پرەزيدەنت قاسىم- جومارت توقايەۆ ساۋد ارابياسىنىڭ تاق مۇراگەرى، پرەمەر- ءمينيسترى، حانزادا مۇحاممەد بەن سالمان ءال ساۋدتى جانە بارشا ساۋد حالقىن «EXPO-2030» حالىقارالىق كورمەسىن رياد قالاسىندا وتكىزۋگە قاتىستى سايلاۋداعى ايقىن جەڭىسىمەن قۇتتىقتادى، دەپ حابارلايدى Kazinform اقوردانىڭ باسپا ءسوز قىزمەتىنە سىلتەمە جاساپ.
- ەلىڭىزدىڭ ايتۋلى شارانى وتكىزۋشى رەتىندە تاڭدالۋى كورولدىكتىڭ جاھاندىق دەڭگەيدەگى مارتەبەسىن، سونداي- اق ساۋدتىقتاردىڭ قاجىرلى ۇمتىلىسى مەن مەملەكەت باسشىلىعىنىڭ جىگەرلى تاباندىلىعىن تاعى دا دالەلدەيدى. شىعاناق وڭىرىندەگى قازاقستاننىڭ باستى سەرىكتەستەرىنىڭ ءبىرى ساۋد ارابياسىمەن تىعىز ىنتىماقتاستىعىمىزدىڭ جىلدان-جىلعا نىعايىپ كەلە جاتقانىن زور ريزاشىلىقپەن اتاپ وتەمىن. بىرلەسكەن كۇش- جىگەرىمىزدىڭ ارقاسىندا الەۋەتى جوعارى قارىم- قاتىناستارىمىزدى حالىقتارىمىزدىڭ يگىلىگى ءۇشىن ودان ءارى دامىتا تۇسەتىنىمىزگە كامىل سەنىمدىمىن، - دەپ جازىلعان جەدەلحاتتا.
مەملەكەت باسشىسى قاسىم- جومارت توقايەۆ ساۋد ارابياسىنىڭ تاق مۇراگەرى، پرەمەر- ءمينيسترى، حانزادا مۇحاممەد بەن سالمان ءال ساۋدتىڭ اسا جاۋاپتى قىزمەتىنە تولاعاي تابىس، ال باۋىرلاس ساۋد حالقىنا قۇت- بەرەكە تىلەدى.
