مەملەكەت باسشىسى رەسەيدىڭ سىرتقى ىستەر ءمينيسترى سەرگەي لاۆروۆتى قابىلدادى
استانا. KAZINFORM - قازاقستان پرەزيدەنتى ش ى ۇ- عا مۇشە مەملەكەتتەردىڭ سىرتقى ىستەر مينيسترلەرى كەڭەسىنىڭ وتىرىسىنا قاتىسۋ ءۇشىن استاناعا كەلگەن رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆتى قابىلدادى.
مەملەكەت باسشىسى رەسەي ديپلوماتىنا ءىلتيپات بىلدىرە وتىرىپ، ەكى ەلدىڭ قاتىناستارى ستراتەگيالىق سەرىكتەستىك جانە وداقتاستىق رۋحىندا قارقىندى دامىپ كەلە جاتقانىن اتاپ ءوتتى.
كەزدەسۋ بارىسىندا ساۋدا-ەكونوميكالىق ىنتىماقتاستىقتى ودان ءارى نىعايتۋ جانە ينۆەستيتسيالىق-ونەركاسىپتىك كووپەراتسيانى ىلگەرىلەتۋ ماسەلەلەرىنە ەرەكشە نازار اۋدارىلدى.
قاسىم-جومارت توقايەۆ بۇعان دەيىن جوعارى دەڭگەيدە قول جەتكىزىلگەن ۋاعدالاستىقتاردى تولىققاندى جۇزەگە اسىرۋدىڭ ماڭىزى زور ەكەنىن ايتتى. ونىڭ پىكىرىنشە، بارلىق تاپسىرما ستراتەگيالىق سيپاتقا يە جانە ەكى ەل اراسىنداعى كوپقىرلى بايلانىستاردى ايتارلىقتاي نىعايتۋعا باعىتتالعان.
سونىمەن قاتار كەزدەسۋدە وڭىرلىك جانە حالىقارالىق كۇن تارتىبىندەگى وزەكتى ماسەلەلەر، سونداي-اق كوپجاقتى فورماتتاعى جانە ينتەگراتسيالىق بىرلەستىكتەر اياسىنداعى ءوزارا ءىس-قيمىلدار تالقىلاندى.
