مەملەكەت باسشىسى: قازاقستان حالقى اسسامبلەياسى ءتيىمدى قۇرىلىمعا اينالدى
استانا. KAZINFORM - ەلورداداعى بەيبىتشىلىك جانە كەلىسىم سارايىندا العىس ايتۋ كۇنىنە ارنالعان فورۋم ءوتىپ، قازاقستان حالقى اسسامبلەياسىنىڭ 30 جىلدىعىنىڭ رەسمي اشىلۋ سالتاناتى ءوتتى.
ق ح ا ءتوراعاسىنىڭ ورىنباسارى مارات ءازىلحانوۆ جينالعان جۇرتقا پرەزيدەنت قاسىم-جومارت توقايەۆتىڭ وسىناۋ ۇيىمنىڭ 30 جىلدىعىنا ارنالعان قۇتتىقتاۋ حاتىن وقىدى.
- قۇرمەتتى اسسامبلەيا مۇشەلەرى! سىزدەردى قازاقستان حالقى اسسامبلەياسىنىڭ قۇرىلعانىنا 30 جىل تولۋىمەن قۇتتىقتايمىن. اسسامبلەيا جىلدار بويى حالقىمىزدىڭ ىرىستى ىنتىماعىن نىعايتۋعا، قوعامداعى ءوزارا تۇسىنىستىك پەن كەلىسىمدى ساقتاۋعا ولشەۋسىز ۇلەس قوسىپ كەلەدى. وسى ۇيىمنىڭ بەلسەندى قىزمەتى ەلىمىزدەگى بارلىق ەتنوستىڭ ءتىلىن، مادەنيەتى مەن سالت-ءداستۇرىن ۇيلەسىمدى دامىتۋعا، سونداي-اق، قازاق ءتىلىنىڭ ەتنوسارالىق قارىم-قاتىناس ءتىلى رەتىندەگى مارتەبەسىن كوتەرۋگە جول اشتى. پارلامەنتتە وكىلدەرى قازاقستان حالقى اسسامبلەياسى مەملەكەت پەن قوعام اراسىندا اشىق ديالوگ ورناتقان ءتيىمدى قۇرىلىمعا اينالدى، - دەلىنگەن قۇتتىقتاۋدا.
مەملەكەت باسشىسى اسسامبلەيا مۇشەلەرى ماڭىزدى باستامالار كوتەرىپ، ەلگە قاجەتتى جوبالاردى جۇزەگە اسىرىپ جاتقانىنا ايتادى.
- ۇيىم مۇشەلەرى قازاقستانداعى اۋقىمدى وزگەرىستەرگە دە بارىنشا اتسالىسىپ كەلەدى. اسسامبلەياعا ۇلتتىڭ جاڭا ساپاسىن قالىپتاستىرۋ، وتانشىلدىق پەن ىنتىماقتاستىق، جاسامپازدىق پەن جاۋاپكەرشىلىك سياقتى باستى قۇندىلىقتاردى دارىپتەۋ جولىندا ايرىقشا ءرول اتقارادى. سىزدەر ەلىمىزدەگى بەيبىتشىلىك پەن تۇراقتىلىقتى ساقتاۋ جانە جالپى ۇلتتىق بىرلىكتى نىعايتۋ ءۇشىن ايانباي ەڭبەك ەتە بەرەسىزدەر دەپ سەنەمىن. جەتىستىكتەرىڭىز كوپ بولسىن، - دەپ جازىلعان پرەزيدەنت حاتىندا.
