مەملەكەت باسشىسى قازاق ءتىلىن دامىتۋعا باعىتتالعان ءبىرقاتار تاپسىرما بەردى
مەملەكەت باسشىسى قاسىم- جومارت توقايەۆ «قازاق ءتىلى» قوعامىنىڭ پرەزيدەنتى، ۇلتتىق قۇرىلتايدىڭ مۇشەسى راۋان كەنجەحان ۇلىن قابىلدادى، دەپ حابارلايدى قازاقپارات.
اقوردا مالىمەتىنە سۇيەنسەك، كەزدەسۋ بارىسىندا مەملەكەتتىك ءتىلدى نىعايتۋ ىسىندەگى وزەكتى ماسەلەلەر تالقىلاندى.
پرەزيدەنت قازاق ءتىلىن ودان ءارى دامىتۋ ماسەلەسى ءارقاشان مەملەكەتتىك ساياساتتىڭ ماڭىزدى باعىتى بولىپ قالا بەرەتىنىن ايتتى. قاسىم- جومارت توقايەۆتىڭ پىكىرىنشە، ەڭ الدىمەن، قازاق ءتىلىنىڭ قولدانىس اياسىن ارتتىرۋعا باعىتتالعان پراكتيكالىق جۇمىستارعا باسىمدىق بەرگەن ءجون. ونىڭ ىشىندە ءبىلىم بەرۋ ىسىندەگى، تەحنولوگياداعى جانە مەديا سالاسىنداعى قازاقشا كونتەنت پەن سيفرلىق ونىمدەردى ازىرلەۋگە ايرىقشا ءمان بەرۋ قاجەت.
سونداي- اق پرەزيدەنت بالالارعا ارنالعان انيماتسيالىق تۋىندىلار شىعارۋدىڭ، كوپشىلىككە ارنالعان كينو ونىمدەرى مەن عىلىمي- تانىمدىق ادەبيەتتەر قورىن مولايتۋدىڭ، الەۋمەتتىك جەلىلەردە اعارتۋشىلىق باعىتتاعى ارنالار اشۋدىڭ ماڭىزدىلىعىنا نازار اۋداردى. وعان قوسا عالامدىق سيفرلىق پلاتفورمالاردى قازاقشالاپ، ءتىل ۇيرەنۋگە مۇمكىندىك بەرەتىن وتاندىق اقپاراتتىق جۇيەلەردى كوبەيتۋ قاجەتتىگىن اتاپ كورسەتتى.
سونىمەن قاتار پرەزيدەنت ءارتۇرلى الەۋمەتتىك توپتاردىڭ، ونىڭ ىشىندە جاستاردىڭ اراسىندا ءتىل تازالىعىن ساقتاۋ ءۇشىن وقۋ جانە جازۋ ساۋاتتىلىعىن ارتتىرۋعا ارنالعان شارالاردىڭ قاجەتتىلىگىنە ەرەكشە توقتالدى.
بۇدان بولەك، قاسىم- جومارت توقايەۆ «قازاق ءتىلى» قوعامىن مەملەكەتتىك ءتىلدى عىلىم مەن تەحنيكا تىلىنە اينالدىرۋ باعىتىندا جۇمىس جۇرگىزۋگە شاقىردى. سونداي- اق الەمدىك تاجىريبەدە مادەني، گۋمانيتارلىق سيپاتتاعى ۇيىمدار ەنداۋمەنت قورلار ارقىلى جۇمىس ىستەيتىنىن اتاپ ءوتىپ، قوعام قىزمەتىن ودان ءارى جانداندىرۋ ءۇشىن وسى تاجىريبەنى ەنگىزۋدى ۇسىندى جانە وعان ءوز اتىنان ۇلەس قوساتىنىن مالىمدەدى.
ءوز كەزەگىندە «قازاق ءتىلى» قوعامىنىڭ پرەزيدەنتى راۋان كەنجەحان ۇلى قوردىڭ باستاماسىمەن جۇزەگە اسىرىلعان جوبالار مەن الداعى جوسپارى جايىندا مالىمەت بەردى.
