مەملەكەت باسشىسى قارجىلىق مونيتورينگ اگەنتتىگىنىڭ ءتوراعاسىن قابىلدادى
استانا. KAZINFORM - مەملەكەت باسشىسى قارجىلىق مونيتورينگ اگەنتتىگىنىڭ ءتوراعاسى دميتري مالاحوۆتى قابىلدادى.
دميتري مالاحوۆتىڭ بايانداماسىنان:
- قىلمىستىق جولمەن تۇسكەن كىرىستەردى جىلىستاتۋعا قارسى كۇرەس سالاسىندا 5,7 مىڭنان استام تۇتىنۋشىمەن ىسكەرلىك قارىم-قاتىناس توقتاتىلعان؛
- كريپتوۆاليۋتا ايىرباستايتىن 1,5 مىڭنان اسا زاڭسىز ونلاين-سەرۆيس انىقتالىپ، بۇعاتتالعان؛
- 49 زاڭسىز ماينەر اشكەرەلەنگەن. قازىر ولارعا قاتىستى تەكسەرۋ جۇمىسى جۇرگىزىلىپ جاتىر؛
- تەرروريستىك جانە ەكسترەميستىك ۇيىمداردىڭ شوتتارىنا قارجى اۋدارۋعا قاتىستى 1,2 مىڭ ارەكەت انىقتالىپ، ولارعا شەكتەۋ قويىلعان.
- 41 قارجى پيراميداسى جويىلىپ، زارداپ شەككەندەرگە 4,6 ميلليارد تەڭگە قايتارىلعان؛
- الاياقتىق بەلگىلەرى بار 8 مىڭنان استام سايت پەن اككاۋنت بۇعاتتالىپ، 4,8 مىڭ ونلاين-كازينو سايتىنىڭ قىزمەتى توقتاتىلعان؛
- ەكىنشى دەڭگەيلى بانكتەرمەن جانە قارجى رەتتەۋشىلەرىمەن بىرلەسىپ، 21 جاسقا تولماعان ازاماتتاردىڭ بۋكمەكەرلىك كەڭسەلەرگە تولەم جاساۋ مۇمكىندىگىن اۆتوماتتى تۇردە شەكتەۋ تەتىگى ەنگىزىلىپ جاتىر؛
- 74 ميلليارد تەڭگە كولەمىندە نەگىزسىز بيۋدجەت شىعىندارىنىڭ الدىن الىپ، زاڭسىز قولما-قول اقشامەن اينالىساتىن 59 «كولەڭكەلى» الاڭ قىزمەتى توقتاتىلعان، سونداي-اق 7 ۇيىمداسقان قىلمىستىق توپ جويىلعان جانە سوتقا دەيىنگى تەرگەۋ امالدارىنىڭ اياسىندا 141 ميلليارد تەڭگە كولەمىندە كەلتىرىلگەن زالال وتەلگەن.
سونىمەن قاتار كاپيتالدى زاڭسىز شىعارۋعا قارسى ءىس-قيمىل سالاسىندا جالپى سوماسى 276 ميلليارد تەڭگەنى قۇرايتىن اكتيۆتەر قايتارىلعان.
اگەنتتىك الداعى ۋاقىتتا زاڭسىز شىعارىلعان اكتيۆتەردى قايتارۋ جانە ادال كاسىپكەرلەردىڭ ىسىنە ارالاسپاي، «كولەڭكەلى» ەكونوميكاداعى قىلمىستاردىڭ جولىن كەسۋ جۇمىستارىنا باسا ءمان بەرەدى.
قارجىلىق مونيتورينگتى دامىتۋ تۇجىرىمداماسىن جانە كولەڭكەلى ەكونوميكاعا قارسى ءىس-قيمىل جونىندەگى كەشەندى جوسپاردى ىسكە اسىرۋ، جىلىستاتۋ جۇيەسىن FATF (اقشانى جىلىستاتۋعا قارسى كۇرەستىڭ قارجىلىق شارالارىن ازىرلەۋ توبى) حالىقارالىق ستاندارتتارىنا تولىق سايكەستەندىرۋ ءۇشىن شارالار قابىلدانادى.
قاسىم-جومارت توقايەۆ ادال بيزنەستى قورعاۋ شارالارىن كۇشەيتۋ قاجەت ەكەنىن ەرەكشە اتاپ ءوتىپ، اگەنتتىك قىزمەتىنىڭ نەگىزگى باعىتتارى بويىنشا جۇمىستاردى جالعاستىرۋدى تاپسىردى.
