مەملەكەت باسشىسى مىسىر پرەزيدەنتىنە قۇتتىقتاۋ جەدەلحاتىن جولدادى
مەملەكەت باسشىسى مىسىر پرەزيدەنتى ابدەل فاتتاح اس-سيسيگە قۇتتىقتاۋ جەدەلحاتىن جولدادى، دەپ حابارلايدى اقوردانىڭ باسپا ءسوز قىزمەتى.
قاسىم-جومارت توقايەۆ قازاقستان حالقىنىڭ جانە جەكە ءوزىنىڭ اتىنان ابدەل فاتتاح اس-سيسيدى مىسىر اراب رەسپۋبليكاسىنىڭ پرەزيدەنتى لاۋازىمىنا قايتا سايلانۋىمەن قۇتتىقتادى.
- سايلاۋداعى ايقىن جەڭىسىڭىز مەملەكەتىڭىزدىڭ دامۋىنا قوسقان مول ۇلەسىڭىز بەن قاجىرلى ەڭبەگىڭىزدىڭ ناتيجەسى، سونداي-اق مىسىر حالقىنىڭ وزىڭىزگە ارتقان زور سەنىمى دەپ بىلەمىن. وسى رەتتە ەلىڭىزدىڭ بولاشاعىن جارقىن، مەرەيىن ۇستەم ەتۋگە باعىتتالعان باستامالارىڭىز بەن جوسپارلارىڭىزدىڭ ءاردايىم ءساتتى جۇزەگە اسا بەرۋىنە تىلەكتەسپىن. قازاقستان مەن مىسىر اراسىنداعى ورتاق رۋحاني قۇندىلىقتار مەن جان-جاقتى ءوزارا ىنتىماقتاستىققا نەگىزدەلگەن ءداستۇرلى قاتىناستاردىڭ ءورىسى كەڭەيگەنىن ەرەكشە اتاپ وتەمىن. حالىقتارىمىزدىڭ يگىلىگى ءۇشىن ەكىجاقتى جانە كوپجاقتى فورماتتارداعى ارىپتەستىگىمىز بولاشاقتا دا جالعاسىن تاۋىپ، قارقىندى دامي بەرەتىنىنە كامىل سەنەمىن، - دەپ جازىلعان جەدەلحاتتا.
