مەملەكەت باسشىسى مىسىر پارلامەنتى سەناتىنىڭ ءتوراعاسىن قابىلدادى
استانا. KAZINFORM - مەملەكەت باسشىسى مىسىر اراب رەسپۋبليكاسى پارلامەنتى سەناتىنىڭ ءتوراعاسى ابدەلۋاحاب ابدەلرازەقتى قابىلدادى، دەپ حابارلايدى اقوردانىڭ باسپا ءسوز قىزمەتى.

پرەزيدەنت قاسىم-جومارت توقايەۆ مىسىر پارلامەنتى سەناتىنىڭ سپيكەرىنە ءىلتيپات بىلدىرە وتىرىپ، ونىڭ قازاقستانعا جاساعان ساپارى ەكىجاقتى پارلامەنتارالىق بايلانىستى نىعايتۋعا تىڭ سەرپىن بەرەتىنىنە سەنىم ءبىلدىردى.
- ءبىز اراب مەملەكەتتەرى اراسىنان، ەڭ الدىمەن، مىسىرمەن ديپلوماتيالىق قاتىناس ورناتتىق. بۇگىندە مىسىر - قازاقستاننىڭ يسلام جانە اراب الەمىندەگى باستى سەرىكتەستەرىنىڭ ءبىرى. سىندارلى ساياسي ديالوگ جولعا قويىلدى. كوپتەگەن ەكىجاقتى شارت پەن كەلىسىم جاسالدى. وسى قارقىندى باسەڭدەتپەي، ىنتىماقتاستىقتى نىعايتا ءتۇسۋ ءۇشىن بىرلەسىپ جۇمىس ىستەۋگە دايىنبىز. ساۋدا- ەكونوميكالىق بايلانىستار ەكىجاقتى قارىم-قاتىناستارىمىزدىڭ باستى نەگىزى بولۋعا ءتيىس. بۇعان قوس مەملەكەتتىڭ الەۋەتى تولىق جەتەدى، - دەدى پرەزيدەنت.
ابدەلۋاحاب ابدەلرازەق مىسىر پرەزيدەنتى ابدەل فاتتاح اس- ءسيسيدىڭ ىزگى تىلەگى مەن سالەمىن جەتكىزدى.
- ءبىز ەكى ەل اراسىنداعى قارىم- قاتىناستى، سونىڭ ىشىندە پارلامەنتارالىق بايلانىستاردى ودان ءارى نىعايتۋعا مۇددەلىمىز. بۇل العا قويعان ماقساتتارىمىزدى ءتيىمدى جۇزەگە اسىرۋ ءۇشىن جاسالعان دۇرىس قادام دەپ ەسەپتەيمىن. مىسىرلىقتاردىڭ قازاقستانعا دەگەن قۇرمەتى مەن ىقىلاسى ەرەكشە. ەكى ەلدى بىرىكتىرەتىن ورتاق دۇنيەلەر كوپ. جۋىق ارادا قوس تاراپقا دا ءتيىمدى شارالار قابىلداناتىنىنا سەنىمدىمىن، - دەدى مىسىر سەناتىنىڭ سپيكەرى.
اڭگىمەلەسۋ بارىسىندا ەكى ەل اراسىنداعى پارلامەنتتىك ديپلوماتيانى دامىتۋ، ساۋدا- ەكونوميكالىق جانە مادەني-گۋمانيتارلىق سالالارداعى ىنتىماقتاستىقتى نىعايتۋ ماسەلەلەرى تالقىلاندى.

مەملەكەت باسشىسى مىسىر كومپانيالارىن كولىك-ترانزيت، تۋريزم، سيفرلاندىرۋ سالالارىندا بىرلەسكەن ينۆەستيتسيالىق جوبالاردى جۇزەگە اسىرۋ مۇمكىندىكتەرىن قاراستىرۋعا شاقىردى.
سونداي- اق سۇلتان بەيبارىس مەشىتىن كۇردەلى جوندەۋدەن وتكىزىپ، تاريحي تۇلعانىڭ ەسىمىن ەل جادىندا جاڭعىرتۋعا زور ۇلەس قوسقانى ءۇشىن مىسىر ۇكىمەتىنە ريزاشىلىعىن ءبىلدىردى.
كەزدەسۋدە ەكى ەلدىڭ حالىقارالىق ۇيىمدار اياسىنداعى قارىم- قاتىناسى مەن جاھاندىق كۇن تارتىبىندەگى وزەكتى ماسەلەلەر قاراستىرىلدى.
ورايلى ءساتتى پايدالانا وتىرىپ، مەملەكەت باسشىسى قاسىم- جومارت توقايەۆ مىسىر پرەزيدەنتى ابدەل فاتتاح اس- سيسيگە جىلى لەبىزى مەن سالەمىن جولدادى.