مەملەكەت باسشىسى مەن ا ق ش ينۆەستيتسيالىق بانكى وكىلىنىڭ كەزدەسۋىنە قاتىستى مينيستر پىكىر ءبىلدىردى
نيۋ-يورك. KAZINFORM - مەملەكەت باسشىسىنىڭ Goldman Sachs Global Institute كومپانياسىنىڭ جاھاندىق ماسەلەلەر جونىندەگى پرەزيدەنتى دجارەد كوەنمەن كەزدەسۋىنە قاتىستى ق ر سيفرلىق دامۋ، يننوۆاتسيالار جانە اەروعارىش ونەركاسىبى ءمينيسترى جاسلان ماديەۆ پىكىر ءبىلدىردى، دەپ حابارلايدى اگەنتتىكتىڭ مەنشىكتى ءتىلشىسى.
جاھاندىق جوبالارمەن اينالىساتىن ا ق ش- تىڭ جەتەكشى ينۆەستيتسيالىق بانكى Goldman Sachs-پەن ماڭىزدى كەزدەسۋ ءوتتى.
تاراپتار ساندىق ينفراقۇرىلىمدى، ونىڭ ىشىندە AI اگەنتتەرىن جانە ءىرى دەرەكتەر ورتالىقتارىن قارجىلاندىرۋدى دامىتۋدىڭ بىرلەسكەن مۇمكىندىكتەرىن تالقىلادى.
- بۇگىندە Goldman Sachs ءارتۇرلى دەرەكتەر ورتالىعىن قارجىلاندىرۋ قۇرالدارىن بەلسەندى تۇردە پايدالانىپ جاتىر. ولاردىڭ ا ق ش- تا وسى سالادا كوپتەگەن جوبالارى بار، سوندىقتان ءبىز ولاردى وڭىرىمىزدەگى تسيفرلىق ينفراقۇرىلىمعا ينۆەستيتسيا تارتۋ ءۇشىن قالاي پايدالانۋعا بولاتىنىن زەرتتەپ جاتىرمىز،- دەدى جاسلان ماديەۆ.
ايتا كەتەيىك، مەملەكەت باسشىسى امەريكالىق Goldman Sachs جەتەكشى ينۆەستيتسيالىق بانكىنىڭ قازاقستان ۇلتتىق بانكىمەن ۇزاق مەرزىمدى سەرىكتەستىك ورناتقانىن اتاپ ءوتىپ، ىقپالداستىق دەڭگەيىنە جوعارى باعا بەردى.
