مەملەكەت باسشىسى ماڭعىستاۋ وبلىسى قۇقىق قورعاۋ ورگاندارىنىڭ قىزمەتكەرلەرىن ماراپاتتادى
استانا. KAZINFORM - پرەزيدەنت قاسىم-جومارت توقايەۆ ماڭعىستاۋعا ساپارى كەزىندە ايماقتاعى قۇقىق قورعاۋ ورگاندارىنىڭ قىزمەتكەرلەرىمەن كەزدەستى، دەپ حابارلايدى اقوردانىڭ باسپا ءسوز قىزمەتى.
مەملەكەت باسشىسى ولاردىڭ ەل ىشىندەگى تۇراقتىلىق پەن تىنىشتىقتى ساقتاۋعا زور ۇلەس قوسىپ كەلە جاتقانىن اتاپ ءوتتى.
- ادىلەتتى قازاقستاندى قۇرۋ جانە «زاڭ مەن ءتارتىپ» قاعيداتىن قوعامدا تەرەڭ ورنىقتىرۋ ءۇشىن تاباندى ەڭبەك ەتىپ جۇرسىزدەر. قاۋىپ-قاتەرگە قاراماستان، بارلىق جۇكتەلگەن مىندەتتى ابىرويمەن اتقارىپ جاتىرسىزدار. ادال قىزمەتتەرىڭىزگە شىنايى ريزاشىلىعىمدى بىلدىرەمىن. بۇگىن مەن ايماقتا قاۋىپسىزدىكتى ساقتاۋ ءۇشىن ءمىنسىز قىزمەت ەتىپ جۇرگەن ءبىرقاتار كۇشتىك قۇرىلىم وكىلدەرىن مەملەكەتتىك ناگرادامەن ماراپاتتاۋ تۋرالى شەشىم قابىلدادىم. جالپى، مەن مەملەكەت باسشىسى رەتىندە قۇقىق قورعاۋ ورگاندارىنىڭ قىزمەتكەرلەرىن ءاردايىم قولدايمىن، ەڭبەكتەرىڭىزدى جوعارى باعالايمىن. الداعى ۋاقىتتا دا مەملەكەتتىڭ تىرەگى، حالىقتىڭ قورعانى بولىپ، ادال قىزمەت ەتەسىزدەر دەپ سەنەمىن، - دەدى پرەزيدەنت.
مەملەكەت باسشىسىنىڭ جارلىعىمەن قىزمەتتىك بورىشىن اتقارۋدا كورسەتكەن ەرلىگى مەن جانقيارلىعى ءۇشىن وفيتسەرلەر مەن سەرجانتتارعا II دارەجەلى «ايبىن» وردەنى، «ەرلىگى ءۇشىن» جانە «جاۋىنگەرلىك ەرلىگى ءۇشىن» مەدالدارى تاپسىرىلدى.
وسىعان دەيىن پرەزيدەنتكە ماڭعىستاۋ وبلىسىنداعى ينۆەستيتسيالىق جوبالار تانىستىرىلدى.
سونىمەن قاتار، قاسىم-جومارت توقايەۆتىڭ توراعالىعىمەن ماڭعىستاۋ وبلىسىنىڭ الەۋمەتتىك-ەكونوميكالىق دامۋى جونىندەگى كەڭەس وتتى.
