مەملەكەت باسشىسى ۇلتتىق عىلىمي ونكولوگيا ورتالىعىنىڭ جاڭا كورپۋسىن ارالاپ كوردى
استانا. KAZINFORM - پرەزيدەنت قاسىم جومارت توقايەۆ ۇلتتىق عىلىمي ونكولوگيا ورتالىعىنداعى جاڭا كورپۋستىڭ قۇرىلىس بارىسىمەن تانىستى.
نىسان بيىل تامىز ايىندا پايدالانۋعا بەرىلەدى، دەپ حابارلايدى اقوردانىڭ باسپا ءسوز قىزمەتى.
عيماراتتىڭ جالپى اۋدانى 58 مىڭ شارشى مەتردەن اسادى. مۇنداعى ستاتسيونار 210 توسەك-ورىنعا ەسەپتەلگەن. ونىڭ ىشىندە 24 ورىن انەستەزيولوگيا، رەانيماتسيا جانە ينتەنسيۆتى تەراپيا بولىمدەرىنە، 150 ورىن كۇندىزگى ستاتسيونارعا ارنالعان. جوسپارعا سايكەس بۇل اۋرۋحانادا جىل سايىن 6 مىڭ ناۋقاس ەمدەلە الادى.
مەملەكەت باسشىسىنا جاڭا كورپۋستا قاتەرلى ىسىكتەردى دياگنوستيكا جاساۋعا جانە ەمدەۋگە قاتىستى الەمدىك بىرەگەي تەحنولوگيالار شوعىرلاناتىنى جونىندە مالىمەت بەرىلدى. مۇندا عىلىمي زەرتتەۋلەر جۇرگىزىپ، عىلىمي-تەحنيكالىق باعدارلامالار مەن ءبىلىم بەرۋ تاجىريبەلەرىن جۇزەگە اسىرۋعا جاعداي جاسالادى.
جاڭا كورپۋس اشىلعاننان كەيىن بۇل ورتالىق ونكولوگيالىق كومەك كورسەتۋ بويىنشا ينتەگراتسيالانعان مودەل قۇرۋ ىسىندە ۇلتتىق ۇيلەستىرۋشىگە اينالادى. اتالعان باستامادا دەنساۋلىق ساقتاۋ جۇيەسىندەگى العاشقى بۋىننان باستاپ ونكولوگيالىق اۋرۋلاردى ەمدەۋگە ماماندانعان بارلىق مەديتسينالىق مەكەمە قامتىلادى.
سونىمەن قاتار ستاتسيوناردا باس جانە مويىن ونكولوگياسى، توراكالدى جانە ابدومينالدى ونكولوگيا، ونكوۋرولوگيا، ماممولوگيا، ونكوگينەكولوگيا، وستەوونكولوگيا جانە ونكوگەماتولوگيا ورتالىقتارىن اشۋ قاراستىرىلعان.
مەملەكەت باسشىسى ۇجىم قىزمەتكەرلەرىمەن كەزدەسۋ بارىسىندا بۇل كورپۋستى سالۋ دەنساۋلىق ساقتاۋ سالاسىنداعى باسىم مىندەتتەردى ساپالى ورىنداۋعا مۇمكىندىك بەرەتىنىن اتاپ ءوتتى.
- جاڭا مەديتسينالىق مەكەمە قۇتتى بولسىن. الەمدە مۇنداي ورتالىقتار وتە از. بۇل ءبىزدىڭ ايماقتاعى مەديتسينالىق تاجىريبە مەن عىلىمدى ۇشتاستىراتىن وزىق مەكەمە بولماق،- دەدى قاسىم-جومارت توقايەۆ.
سونداي- اق پرەزيدەنت نىسان قۇرىلىسىنىڭ مەرزىمى مەن جوعارى ساپا ستاندارتتارىن قاتاڭ ساقتاۋ قاجەت ەكەنىنە نازار اۋداردى.
