مەملەكەت باسشىسى «ەكونوميكانى ىرىقتاندىرۋ جونىندەگى شارالار تۋرالى» جارلىققا قول قويدى

Ақорда
Фото: Ақорда

استانا. KAZINFORM - اتالعان جارلىق پرەزيدەنتتىڭ بيىل 7-اقپانداعى ۇكىمەتتىڭ كەڭەيتىلگەن وتىرىسىندا بەرگەن تاپسىرماسىن ورىنداۋ شەڭبەرىندە ازىرلەندى.

بۇل قۇجات باسەكەلەستىكتى دامىتۋ، ەكونوميكاعا مەملەكەتتىڭ ارالاسۋىن قىسقارتۋ، بيزنەس شىعىندارىن ازايتۋ ارقىلى كاسىپكەرلىك ەركىندىكتى قامتاماسىز ەتۋگە باعىتتالعان.

بۇل تۋرالى اقوردانىڭ باسپا ءسوز قىزمەتى ءمالىم ەتتى.

بىرىنشىدەن، قازاقستان رەسپۋبليكاسىنىڭ باسەكەلەستىكتى قورعاۋ جانە دامىتۋ اگەنتتىگىنىڭ جانىنان جەكەشەلەندىرۋگە جاتاتىن مەملەكەتتىك اكتيۆتەردىڭ كريتەرييلەرىن ازىرلەۋدى جانە ولاردىڭ تىزبەسىن قالىپتاستىرۋدى قامتاماسىز ەتەتىن جەكەشەلەندىرۋ جونىندەگى ۇلتتىق وفيس قۇرۋ كوزدەلگەن.

ەكىنشىدەن، «سامۇرىق-قازىنا» ءۇ ءا ق» ا ق مەن ونىڭ ەنشىلەس كومپانيالارىندا كورپوراتيۆتىك باسقارۋدىڭ دەربەستىگى مەن ساپاسىن ارتتىرۋ، سونداي-اق ولار جۇزەگە اسىراتىن ساتىپ الۋ پروتسەستەرىن جەتىلدىرۋ جونىندەگى شارالار قاراستىرىلعان.

ۇشىنشىدەن، تاۋارلار نارىعىنداعى باسەكەلەستىكتى دامىتۋ ءۇشىن ءبىرقاتار ناقتى شارانى ىسكە اسىرۋ كوزدەلىپ وتىر.

تورتىنشىدەن، بيزنەس اشۋ جانە جۇرگىزۋ ءۇشىن رەتتەۋ ساياساتىن ودان ءارى جەتىلدىرۋ جانە راسىمدەردى ىرىقتاندىرۋ شارالارى ۇسىنىلادى. وسىلايشا، تۇتىنۋشىلاردىڭ كۆازيمەملەكەتتىك ۇيىمدار كورسەتەتىن كوممەرتسيالىق قىزمەتتەرگە قولجەتىمدىلىگىن، تەحنيكالىق شارتتاردى الۋ جانە ينجەنەرلىك جەلىلەرگە قوسىلۋ راسىمدەرىن جەڭىلدەتۋ جانە اۆتوماتتاندىرۋ (سيفرلاندىرۋ) كوزدەلەدى.

قازاقستاندىق ستاندارتتار بويىنشا مىندەتتى تۇردە جوبالاۋ-سمەتالىق قۇجاتتاما ازىرلەمەي، وبەكتىلەردى سالۋ ءۇشىن وزىق حالىقارالىق ستاندارتتارعا ساي كەلەتىن جوبالاردى پايدالانۋعا مۇمكىندىك بەرۋ تاپسىرىلادى.

بەسىنشىدەن، جارلىقتا بيزنەستىڭ قۇقىقتارى مەن زاڭدى مۇددەلەرىن قورعاۋدى كۇشەيتۋگە، سونىڭ ىشىندە ەكونوميكالىق قىزمەت سالاسىنداعى قىلمىستىق قۇقىق بۇزۋشىلىقتاردى قىلمىس ساناتىنان الىپ تاستاۋ، مەملەكەتتىك ورگاندار باستاماشىلىق ەتەتىن تىيىم سالۋ-شەكتەۋ شارالارىن پروكۋرورلارمەن كەلىسۋ جانە باسقا دا راسىمدەر ارقىلى كۇشەيتۋگە باعىتتالعان ءىس-شارالار كەشەنى جەكە بلوك رەتىندە بەرىلگەن.

جارلىقتىڭ جۇزەگە اسىرىلۋى ەكونوميكاداعى مەملەكەتتىك سەكتوردىڭ ۇلەسىن اۋقىمدى جانە جەدەل تۇردە قىسقارتۋعا، سونداي-اق جەكە كاسىپكەرلىك ءۇشىن ەكونوميكالىق كەڭىستىكتى ۇلعايتۋعا قوسىمشا سەرپىن بەرەدى.

سوڭعى جاڭالىقتار