مەملەكەت باسشىسى «جول عىلىمي- وندىرىستىك ورتالىعى» ج ش س ديرەكتورى باعدات تەلتايەۆتى قابىلدادى
الماتى. KAZINFORM - پرەزيدەنت قاسىم-جومارت توقايەۆ جول قۇرىلىسى جانە جول جابىندىلارى مەحانيكاسىن زەرتتەۋشى عالىم باعدات تەلتايەۆپەن كەزدەستى. بۇل تۋرالى اقوردانىڭ باسپا ءسوز قىزمەتى ءمالىم ەتتى.
جۇزدەسۋدە الماتى قالاسىنداعى جانە ەلىمىزدەگى جول ينفراقۇرىلىمىن دامىتۋ پەرسپەكتيۆالارى، يننوۆاتسيالىق تەحنولوگيالاردى ەنگىزۋ جانە اتالعان سالاعا مامان دايارلاۋ ماسەلەلەرى تالقىلاندى.
مەملەكەت باسشىسىنا قالالاردىڭ قارقىندى دامۋىنا بايلانىستى تۋىنداعان، كولىك ينفراقۇرىلىمىنا ايتارلىقتاي سالماق تۇسىرەتىن باستى پروبلەمالار مەن سىن-قاتەرلەر تۋرالى مالىمەت بەرىلىپ، ولاردى شەشۋ جولدارى جونىندە باياندالدى.
اتاپ ايتقاندا، باعدات تەلتايەۆ جول قۇرىلىسىنا قۇرامىندا پوليمەر قوسىندىلارى بار اسفالتبەتون قولدانۋ تاجىريبەسىنىڭ ءساتتى وتكەنىن جەتكىزدى. جۇرگىزىلگەن سىناق ناتيجەسىندە اتالعان تەحنولوگيا جولدىڭ ويىلۋىنا جانە جارىقشاقتاردىڭ پايدا بولۋىنا، سونداي-اق تاعى دا باسقا كليماتتىق اسەرلەرگە ءتوزىمدى ەكەنى انىقتالدى.
پرەزيدەنت قاسىم-جومارت توقايەۆ سالانى دامىتۋعا قوسقان ۇلەسى ءۇشىن باعدات تەلتايەۆقا ريزاشىلىعىن ءبىلدىرىپ، جول ينفراقۇرىلىمىنىڭ ساپاسى مەن قاۋىپسىزدىگىن جاقسارتۋ ءۇشىن عىلىمي زەرتتەۋلەردى جالعاستىرۋدىڭ جانە جول قۇرىلىسىنا وزىق تەحنولوگيالاردى ەنگىزۋدىڭ ماڭىزدى ەكەنىنە نازار اۋداردى. ايتىلعان ۇسىنىستار نەگىزىندە ۇكىمەتكە جانە سالالىق مينيسترلىككە ءتيىستى تاپسىرمالار بەرىلەدى.
