مەملەكەت باسشىسى: جاستىق شاق - ۋاقىتتى بوسقا وتكىزەتىن ەمەس، ەل ءۇشىن تاباندى قىزمەت ەتەتىن كەز
الماتى. KAZINFORM - مەملەكەت باسشىسى قاسىم- جومارت توقايەۆ الماتىدا عالىمدارمەن كەزدەسۋ بارىسىندا كەزىندە شوقان، اباي، ءاليحان، احمەت، قانىش سياقتى ارىستارىمىز زيالىلىعىمەن تالايدى تاڭعالدىرعانىن ايتتى. بۇل تۋرالى اقوردانىڭ باسپا ءسوز قىزمەتى حابارلادى.
پرەزيدەنت ءبىزدى الەم ەلدەرى كوزى اشىق، كوكىرەگى وياۋ حالىق رەتىندە تانيتىنىن اتاپ ءوتتى.
«كەزىندە شوقان، اباي، ءاليحان، احمەت، قانىش سياقتى ارىستارىمىز زيالىلىعىمەن تالايدى تاڭعالدىرعان. وزگە جۇرتتىڭ قازاق تۋرالى پىكىرى وسىنداي تۇلعالارىمىز ارقىلى قالىپتاسقان. قازىر دە ءوزىنىڭ ءبىلىمى، ونەرى ارقىلى الەمدى مويىنداتىپ جۇرگەن جاستارىمىز از ەمەس. ولار كەز كەلگەن ءتىلدى تەز مەڭگەرىپ الادى. قانداي ورتاعا دا جىلدام بەيىمدەلەدى. ءبىزدى الەم ەلدەرى كوزى اشىق، كوكىرەگى وياۋ حالىق رەتىندە تانيدى. ءبىلىمپازدىق، ەڭبەكقورلىق، العىرلىق پەن جاسامپازدىق - قانىمىزعا سىڭگەن قاسيەت. وسى قاسيەتتەرىمىزدى ءاردايىم ءتيىمدى پايدالانا ءبىلۋىمىز كەرەك»، - دەدى پرەزيدەنت.
مەملەكەت باسشىسى قازىرگى زامانعى تەحنولوگيانى مەڭگەرگەن جاس عالىمدارعا زور ءۇمىت ارتاتىنىن جەتكىزدى.
«جاستاردىڭ عىلىممەن اينالىسۋىنا بارىنشا جاعداي جاساپ جاتىرمىز. بيىل ۇلتتىق عىلىم اكادەمياسىنىڭ جانىنان جاس عالىمدار كەڭەسى قۇرىلدى. بۇل كەڭەس تالاپتى جاستاردىڭ باسىن قوسىپ، عىلىم جولىنا جۇمىلدىرادى دەپ سەنەمىن. شاكارىم «جاس كوڭىلدە جارىق بار» دەپ ايتقان. جاستارىمىز جاسامپاز جانە جاڭاشىل بولۋى كەرەك. جاستىق شاق - ۋاقىتتى بوسقا وتكىزەتىن ەمەس، ەل ءۇشىن تاباندى قىزمەت ەتەتىن كەز. اكادەميك قانىش ساتبايەۆتىڭ ءومىر جولى - وسىنىڭ جارقىن مىسالى. عۇلاما عالىم نەبارى 25 جاسىندا «الگەبرا» وقۋلىعىن جازۋعا كىرىسكەن. ال 30 جاس شاماسىندا جەزقازعانداعى كەن ورنىن اشقان.
جاس عالىمدارىمىز تۋعان ەلىنە پايداسى تيەتىن جۇمىسپەن اينالىسقانى ءجون. ۇرپاقتىڭ ءبىلىمدى، وتانشىل، مەملەكەتشىل بولۋى ماڭىزدى. جاستارىمىز ادال ازامات بولۋى كەرەك. ەلىنە، ءوز ىسىنە ادال ازاماتتار عانا قازاقستاندى كوركەيتە الادى»، - دەدى پرەزيدەنت.
پرەزيدەنت قاسىم- جومارت توقايەۆ عالىمدارمەن كەزدەستى.
بىزگە عالىمدار، ينجەنەرلەر، ونەرتاپقىشتار قاجەت ەكەنىن ايتتى.
