مەملەكەت باسشىسى حەلەن كلاركتى قابىلدادى
استانا. KAZINFORM - مەملەكەت باسشىسى «ءوندىرۋشى سالالاردىڭ اشىقتىعى باستاماسى» ۇيىمىنىڭ باسقارما ءتوراعاسى حەلەن كلاركتى قابىلدادى.
كەزدەسۋدە قاسىم-جومارت توقايەۆ قازاقستان 2007-جىلى اتالعان ۇيىمعا مۇشە بولعاننان بەرى ءو س ا ب ستاندارتتارىن ساقتاۋعا بەيىلدىگىن كورسەتىپ كەلە جاتقانىن اتاپ ءوتتى. ەلىمىزدە جەر قويناۋىن پايدالانۋشىلاردىڭ ۇيىم تالاپتارىن ساقتاۋ مىندەتتەمەلەرى جانە بيۋجەتكە اۋداراتىن سالىق پەن باسقا دا تولەمدەرى بويىنشا ەسەبى زاڭنامالىق دەڭگەيدە بەكىتىلدى.
پرەزيدەنت ۇيىم باسشىسىنا گەولوگيالىق بارلاۋ مەن كەن ءوندىرۋ سالاسىندا قابىلدانعان رەتتەۋ شارالارى تۋرالى اقپارات بەردى. اتاپ ايتقاندا، سالانى دامىتۋدىڭ كەشەندى جوسپارى قابىلدانىپ، ينتەراكتيۆتى كارتا مەن 50 مىڭنان اسا گەولوگيالىق ەسەپتەر قامتىلعان جەر قويناۋىن پايدالانۋدىڭ ءبىرىڭعاي پلاتفورماسى ىسكە قوسىلدى. بۇدان بولەك، بيزنەستىڭ بارلاۋ جانە ءوندىرۋ جۇمىستارىنا ليتسەنزيا الۋ ءتارتىبى جەڭىلدەتىلدى.
حەلەن كلارك ۇيىمنىڭ الداعى كەزەڭگە ارنالعان ستراتەگيالىق جوسپارىمەن جانە باسىم باعىتتارىمەن ءبولىستى. ول قازاقستاننىڭ جەر قويناۋىن پايدالانۋعا قاتىستى زاڭنامالىق اكتىلەرىن جەتىلدىرۋ جۇمىستارىن جوعارى باعالادى. بۇل كەن ءوندىرۋ ونەركاسىبىنىڭ اشىقتىعىن قامتاماسىز ەتۋ تالاپتارىن ورىنداۋعا مۇمكىندىك بەرەدى.
