مەملەكەت باسشىسى ءماجىلىستىڭ 2023-جىلى اتقارعان جۇمىسىنا وڭ باعا بەردى
مەملەكەت باسشىسىنا ءماجىلىستىڭ زاڭ شىعارۋ قىزمەتى تۋرالى باياندالدى، دەپ حابارلايدى Kazinform اقوردانىڭ باسپا ءسوز قىزمەتىنە سىلتەمە جاساپ.
ەرلان قوشانوۆ سەسسيا باستالعالى بەرى 35 زاڭ قابىلدانىپ، سەناتقا جولدانعانىن جەتكىزدى. سونىمەن قاتار «ۇلتتىق قور - بالالارعا» باعدارلاماسىنىڭ جۇزەگە اسىرىلۋىن، سونداي-اق جەر قويناۋىن پايدالانۋ، بيزنەس جۇرگىزۋ، تالىمگەرلىك پەن بالالاردىڭ قاۋىپسىزدىگى، دەنساۋلىققا زيان كەلتىرەتىن جۇمىس ورىندارىندا ەڭبەك ەتەتىن ازاماتتاردى ارنايى تولەماقىمەن قامتاماسىز ەتۋ ماسەلەلەرىن رەتتەيتىن قۇجاتتار قابىلدانعانىن ايتتى.
قازىرگى ۋاقىتتا دەپۋتاتتاردىڭ قاراۋىندا 69 زاڭ جوباسى جاتقانىن جانە ونىڭ ۇشتەن ءبىر بولىگىنە ءماجىلىس دەپۋتاتتارى وزدەرى باستاماشى بولعانىن اتاپ ءوتتى. بيۋجەت كودەكسى، حالىقتىڭ تىم كوپ نەسيە الۋىن تومەندەتۋ، تۇرعىن ءۇي ساياساتى، مەملەكەتتىك ساتىپ الۋ، عىلىم جانە تەحنولوگيالىق ساياسات، تۇتىنۋشىلاردىڭ قۇقىقتارىن قورعاۋ، جىلۋ ەنەرگەتيكاسى، ماسس-مەديا، ادام ساۋداسىنا قارسى ءىس-قيمىل جانە باسقا دا زاڭ جوبالارى بويىنشا جۇمىستار جۇرگىزىلىپ جاتقانىن جەتكىزدى.
ءماجىلىس دەپۋتاتتارى حالىقتىڭ قارجىلىق ساۋاتىن ارتتىرۋ ءۇشىن پارلامەنتتىك تىڭداۋ، مەديتسينالىق ساقتاندىرۋ جۇيەسىن دامىتۋ، ەسىرتكى قىلمىسىنا قارسى ءىس-قيمىل جانە ساۋدا ساياساتىن جەتىلدىرۋ ماقساتىندا ۇكىمەت ساعاتتارىن وتكىزگەنى جونىندە مالىمەت بەردى. دەپۋتاتتار جىلدىڭ العاشقى كۇنىنەن باستاپ سايلاۋشىلارمەن كەزدەسۋ جانە حالىقتىڭ تۇرمىسىن جاقسارتۋ جونىندەگى پرەزيدەنت تاپسىرمالارىنىڭ ورىندالۋىنا باقىلاۋ جۇرگىزۋ ءۇشىن وڭىرلەرگە اتتانعانىن ايتتى.
مەملەكەت باسشىسى ءماجىلىستىڭ 2023-جىلى اتقارعان جۇمىستارىنا وڭ باعا بەردى. پرەزيدەنتتىڭ ايتۋىنشا، قابىلدانعان زاڭدار حالىقتىڭ تۇرمىس ساپاسىن ارتتىرۋعا تىكەلەي ىقپال ەتەدى.
قاسىم-جومارت توقايەۆ ەلىمىزدىڭ الەۋمەتتىك-ەكونوميكالىق جاڭعىرۋ باعدارىنا قاتىستى نەگىزگى شارالاردى جۇزەگە اسىرۋدى كوزدەيتىن زاڭداردى قابىلداۋ قاجەت ەكەنىنە نازار اۋداردى.
