مەملەكەت باسشىسى باسپا ءسوز قىزمەتكەرلەرىن ۇلتتىق باسىلىم كۇنىمەن قۇتتىقتادى
استانا. KAZINFORM - مەملەكەت باسشىسى باسپا ءسوز قىزمەتكەرلەرىن ۇلتتىق باسىلىم كۇنىمەن قۇتتىقتادى.
«قۇرمەتتى باسپا ءسوز قىزمەتكەرلەرى! بارشاڭىزدى ۇلتتىق باسىلىم كۇنىمەن شىن جۇرەكتەن قۇتتىقتايمىن! سوناۋ 1913 -جىلى، ءدال وسى كۇنى ەلىمىزدىڭ باسپا ءسوز سالاسىنىڭ باستاۋىندا تۇرعان «قازاق» گازەتىنىڭ العاشقى سانى جارىق كوردى. حالقىمىزدىڭ ءبىرتۋار پەرزەنتتەرى - الاش ارىستارى شىعارعان بۇل باسىلىم سىندارلى ساتتەردە ۇلتتى ۇيىستىرۋعا ايرىقشا ىقپال ەتتى. ءسوز بوستاندىعىنا ادالدىعىنان اينىماعان باسىلىمدار ءاردايىم شىنايى اقپاراتتىڭ جانە ساپالى ساراپتامانىڭ قاينار كوزى بولىپ قالا بەرەدى. گازەت-جۋرنالدار زامانا تىنىسىن ءدوپ باسىپ، مەملەكەت پەن قوعامداعى قوردالانعان ماسەلەلەردى كوتەرەدى، ءتۇرلى كوزقاراستاعى وي-پىكىرلەردى جارىققا شىعارادى. سونداي-اق جالپى ادامزاتقا ورتاق ىزگى قۇندىلىقتاردى دارىپتەيدى. باسپا ءسوز قىزمەتكەرلەرى كاسىبي بىلىكتىلىكتىڭ، وتانشىلدىق پەن جاۋاپكەرشىلىكتىڭ وزىق ۇلگىسىن كورسەتىپ كەلەدى. ءبىزدىڭ باسىلىمدارىمىز حالىقتىڭ بىرلىگىن نىعايتۋعا اتسالىسىپ، ادىلەتتى قازاقستاندى قۇرۋ ىسىنە ەلەۋلى ۇلەس قوسا بەرەدى دەپ سەنەمىن»، - دەپ جازىلعان پرەزيدەنت قۇتتىقتاۋىندا.
مەملەكەت باسشىسى سالا ماماندارىنا زور دەنساۋلىق، باق-بەرەكە جانە شىعارماشىلىق شابىت تىلەدى.
