مەملەكەت باسشىسى باقتىقوجا ىزمۇحامبەتوۆتى قابىلدادى
استانا. KAZINFORM - پرەزيدەنت قاسىم-جومارت توقايەۆ ءماجىلىس دەپۋتاتى، «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ ءتوراعاسى، ۇلتتىق قۇرىلتاي مۇشەسى باقتىقوجا ىزمۇحامبەتوۆتى قابىلدادى.
مەملەكەت باسشىسىنا «ارداگەرلەر ۇيىمى» رەسپۋبليكالىق قوعامدىق بىرلەستىگىنىڭ اتقارىپ جاتقان جۇمىستارى جونىندە مالىمەت بەرىلدى. باقتىقوجا ىزمۇحامبەتوۆتىڭ ايتۋىنشا، قازىر 2 جوبا جۇزەگە اسىرىلىپ جاتىر. اتاپ ايتقاندا، «دانەكەر» باستاماسى قولعا الىنعان. ونىڭ ناتيجەسىندە سوڭعى 4 جىلدا 6896 داۋدىڭ 4563 ىندە تاراپتار ءىستى سوتقا جەتكىزبەي كەلىسىمگە كەلگەن. ال، مۇقتاج ازاماتتارعا الەۋمەتتىك قولداۋ كورسەتۋگە باعىتتالعان «ىسكەرلىك جانە جاناشىرلىق» جوباسى قازىر اتىراۋ، سولتۇستىك قازاقستان جانە قىزىلوردا وبلىستارىندا ىسكە اسىرىلىپ جاتىر.
بۇدان بولەك، پرەزيدەنتكە ارداگەرلەردىڭ «قوعامدىق باقىلاۋ تۋرالى» زاڭدى جۇزەگە اسىرۋعا بەلسەندى اتسالىسىپ جاتقانى جونىندە باياندالدى. ولار سۋ تاسقىنىمەن كۇرەس كەزىندە حالىقتى سابىرعا شاقىرىپ، ءتۇسىندىرۋ جۇمىستارىن جۇرگىزدى.
كەزدەسۋدە مەملەكەت باسشىسىنا مۇناي- گاز، اۋىل شارۋاشىلىعى سالالارىنا، وڭىرلەردە ازىق-تۇلىك باعاسىن تۇراقتاندىرۋعا جانە ءدىن ماسەلەسىنە قاتىستى ۇسىنىستار بەرىلدى.
