مەملەكەت باسشىسى ازيا دامۋ بانكىنىڭ پرەزيدەنتى ماساتسۋگۋ اساكاۆانى قابىلدادى
استانا. KAZINFORM - قاسىم-جومارت توقايەۆ ورتالىق ازيا وڭىرلىك ەكونوميكالىق ىنتىماقتاستىعى باعدارلاماسىنىڭ 23- مينيسترلىك كونفەرەنتسياسىنا قاتىسۋ ءۇشىن استاناعا كەلگەن ازيا دامۋ بانكىنىڭ پرەزيدەنتى ماساتسۋگۋ اساكاۆامەن كەزدەستى، دەپ حابارلايدى اقوردانىڭ ءباپاسوز قىزمەتى.
مەملەكەت باسشىسى مارتەبەلى مەيماندى قازاقستان مەن ازيا دامۋ بانكىنىڭ ناتيجەلى قارىم- قاتىناسىنىڭ 30 جىلدىعىمەن قۇتتىقتادى. قاسىم-جومارت توقايەۆ ەلىمىز قارجى ينستيتۋتىمەن ءوزارا ىقپالداستىقتىڭ ستراتەگيالىق سيپاتىن، سونداي- اق بانكتىڭ ءىرى ينفراقۇرىلىمدىق جوبالاردى جۇزەگە اسىرۋعا جانە ۇلتتىق قارجى جۇيەسىن نىعايتۋعا قوسقان ۇلەسىن جوعارى باعالايتىنىن ايتتى.
ازيا دامۋ بانكى 1994-2024 -جىلدار ارالىعىندا قازاقستاندا جالپى سوماسى 7 ميلليارد دوللارعا جۋىق جوبالاردى قارجىلاندىردى. اتاپ ايتقاندا، بانك باتىس قىتاي - باتىس ەۋروپا حالىقارالىق كولىك ءدالىزىن سالۋعا، سونداي-اق اقتوبە - قاندىاعاش جولىن قايتا جوندەۋگە قاتىستى.
قازاقستان پرەزيدەنتى جاڭا باسىم باعىتتار بويىنشا بىرلەسكەن شارالاردى ودان ءارى جالعاستىرۋدىڭ ماڭىزدى ەكەنىن اتاپ ءوتتى. مەملەكەت باسشىسى قازاقستاندا ەكونوميكانى ىرىقتاندىرۋ، ينۆەستيتسيالىق احۋالدى جاقسارتۋ جانە ەلىمىزدىڭ ەكونوميكالىق الەۋەتىن ارتتىرۋ ءۇشىن قاجەتتى جاعداي جاساۋ جۇمىستارى جالعاسىپ جاتقانىن جەتكىزدى. قاسىم-جومارت توقايەۆ ەكونوميكانى دەكاربونيزاتسيالاۋ ءوزارا ءىس- قيمىلدىڭ پەرسپەكتيۆتى سالالارىنىڭ ءبىرى ەكەنىنە توقتالدى.
وسىعان دەيىن پرەزيدەنت قاسىم-جومارت توقايەۆ استاناعا جۇمىس ساپارىمەن كەلگەن رەسەي فەدەراتسياسىنىڭ سىرتقى ىستەر ءمينيسترى سەرگەي لاۆروۆپەن كەزدەسكەن بولاتىن.
