مەملەكەت باسشىسى اقمولا وبلىسىنىڭ اكىمى مارات احمەتجانوۆقا ءبىرقاتار تاپسىرما بەردى
مەملەكەت باسشىسى اقمولا وبلىسىنىڭ اكىمى مارات احمەتجانوۆتى قابىلدادى، دەپ حابارلايدى Kazinform اقوردانىڭ باسپا ءسوز قىزمەتىنە سىلتەمە جاساپ.
مارات احمەتجانوۆ اقمولا وبلىسىنىڭ الەۋمەتتىك-ەكونوميكالىق دامۋى جايىندا باياندادى، ءوڭىر ەكونوميكاسىنىڭ ءبىرقاتار سالاسىندا وڭ ناتيجەلەر بار ەكەنى تۋرالى مالىمەت بەردى. ايتۋىنشا، نەگىزگى كاپيتالعا سالىنعان ينۆەستيتسيا كولەمى 530 ميلليارد تەڭگەگە جەتكەن. ونىڭ ىشىندە جەكە ينۆەستيتسيا 435 ميلليارد تەڭگەدەن اسقان. 154 جوبا ىسكە اسىرىلىپ، 1,5 مىڭ جۇمىس ورنى اشىلعان.
اقمولا وبلىسىنىڭ اكىمى شارۋالاردى قولداۋ جانە قايتا وڭدەلگەن ءونىم ۇلەسىن ارتتىرۋ شارالارى تۇراقتى تۇردە قابىلدانىپ جاتقانىن ايتتى. جىل باسىنان بەرى وسىمدىك مايى، وڭدەلگەن ەت، ءسۇت، ماي، ىرىمشىك جانە سۇزبە سياقتى ازىق-تۇلىك تۇرلەرىن ءوندىرۋ كورسەتكىشى وسكەن. ماكينسك قۇس فابريكاسىنىڭ 3-كەزەڭى ىسكە قوسىلعانىن جانە «اق-دالا اگرو» جاۋاپكەرشىلىگى شەكتەۋلى سەرىكتەستىگىنىڭ وندىرىستىك قۋاتى كەزەڭ-كەزەڭىمەن ارتىپ كەلەتىنىن حابارلادى. بۇل وبلىستىڭ قۇس ەتىن ءوندىرۋ بويىنشا ەلىمىزدە كوشباسشى وڭىرلەردىڭ بىرىنە اينالۋىنا مۇمكىندىك بەرگەن.
سونىمەن قاتار جىلىتۋ ماۋسىمىنىڭ بارىسى تۋرالى باياندادى. بارلىق كوممۋنالدىق قىزمەتتىڭ جۇمىسى قاتاڭ باقىلاۋعا الىنعان. كوكشەتاۋ جانە ستەپنوگورسك قالالارىنداعى نىساندار كەزەڭ-كەزەڭىمەن جاڭعىرتىلعان. كوكشەتاۋ قالاسىن دامىتۋعا قاتىستى باس جوسپاردىڭ جوباسى ازىرلەنگەنى تۋرالى اقپارات بەردى.
بۇل جوبا قالانىڭ ەكولوگيالىق جانە ينفراقۇرىلىمدىق ماسەلەلەرىن شەشۋدى كوزدەيدى. حالىقتىڭ تۇرمىسىن جاقسارتۋعا جانە ىرگەلەس ميگراتسيانى تومەندەتۋگە ىقپال ەتەتىن اگلومەراتسيانى دامىتۋ جونىندەگى جاڭا كەشەندى جوسپاردىڭ جوباسىن تانىستىردى.
قاسىم-جومارت توقايەۆ ءوڭىردى ودان ءارى دامىتۋ، اۋىل شارۋاشىلىعى ونىمدەرىن تەرەڭ وڭدەۋ جوبالارىن ىسكە اسىرۋ، ينۆەستيتسيا تارتۋ، سونداي-اق اقمولا وبلىسىنىڭ قالالارىن جىلۋمەن ۇزدىكسىز قامتاماسىز ەتۋ جونىندە ءبىرقاتار تاپسىرما بەردى.
