مەملەكەت باسشىسى الەمدىك نارىقتاعى جاعدايدىڭ وزگەرۋىنە بايلانىستى جيىن وتكىزدى
استانا. KAZINFORM - قاسىم-جومارت توقايەۆ پرەمەر-مينيستر ولجاس بەكتەنوۆتىڭ، ۇلتتىق بانك ءتوراعاسى تيمۋر سۇلەيمەنوۆتىڭ جانە باسقا دا لاۋازىمدى تۇلعالاردىڭ قاتىسۋىمەن جيىن وتكىزدى. بۇل تۋرالى اقوردا ءمالىم ەتتى.
وندا الەمدىك نارىقتاعى تاريفتىك قاقتىعىستاردىڭ سالدارىنان ەنەرگەتيكا رەسۋرستارى جانە نەگىزگى تاۋارلار باعاسىنىڭ قۇلدىراۋىنا بايلانىستى ەل ەكونوميكاسىندا قالىپتاسقان احۋال قارالدى.
- مەملەكەت باسشىسى ۇكىمەت پەن جەرگىلىكتى اتقارۋشى ورگانداردىڭ ءىس-قيمىل جوسپارىن قىسقا مەرزىمدە اياقتاۋدى تاپسىردى. بۇل جۇمىس قارجى-ەكونوميكالىق داعدارىس كەزىندە ءوسىمدى جانە تارتىلاتىن ينۆەستيتسيا كولەمىن تومەندەتپەۋدى كوزدەيدى. قاسىم-جومارت توقايەۆ قازىرگى اسا قولايسىز جاعدايعا قاراماستان، ەلىمىزدىڭ ەكونوميكالىق دامۋى بويىنشا ءوزى جاريالاعان باسىمدىقتار، سونىڭ ىشىندە ءىرى ينفراقۇرىلىمدىق جوبالار، سيفرلاندىرۋ مەن جاساندى ينتەللەكتىنى دامىتۋ، اۋىل شارۋاشىلىعى مەن كولىك-لوگيستيكا سالاسىن جاڭعىرتۋ باستامالارى تولىق جۇزەگە اسىرىلاتىنىن ايتتى، - دەلىنگەن حابارلامادا.
پرەزيدەنت كەلەسى اپتادا وسى ماسەلەگە وراي ارنايى كەڭەس وتكىزۋدى جوسپارلاپ وتىر.
ەسكە سالا كەتەيىك، بۇعان دەيىن مۇناي باعاسى قۇلدىراپ، دوللاردىڭ باعامى «ۇشقانىنا» بايلانىستى ۇلتتىق بانك ۆاليۋتا نارىعى تۋرالى اقپارات تاراتقانىن جازعان بولاتىنبىز.
