مەملەكەت باسشىسى ا ق ش كونگرەسى وكىلدەر پالاتاسىنىڭ مۇشەسى كەرول ميللەردى قابىلدادى
استانا. KAZINFORM - قاسىم-جومارت توقايەۆ بۇل كەزدەسۋدىڭ ەكى مەملەكەت اراسىنداعى ىنتىماقتاستىققا تىڭ سەرپىن بەرۋ تۇرعىسىنان ماڭىزى زور ەكەنىنە نازار اۋداردى. پرەزيدەنتتىڭ ايتۋىنشا، تاۋەلسىزدىك العان ساتتەن باستاپ اقش قازاقستاننىڭ سەنىمدى سەرىكتەسى سانالادى.
قازاقستان پرەزيدەنتى وڭىرلىك جانە حالىقارالىق قاۋىپسىزدىكتى قامتاماسىز ەتۋ، يادرولىق قارۋدى تاراتپاۋ سەكىلدى نەگىزگى سالالارداعى، سونداي- اق ساۋدا-ەكونوميكالىق، ينۆەستيتسيالىق ىقپالداستىقتاعى بىرلەسكەن تابىستاردى اتاپ ءوتتى. مەملەكەت باسشىسىنىڭ ايتۋىنشا، ەكى ەل اراسىنداعى تاۋار اينالىمى تۇراقتى تۇردە ءوسىپ، 4 ميلليارد دوللاردان اسقان.
كەرول ميللەر سىي- قۇرمەت كورسەتكەنى ءۇشىن قازاقستان پرەزيدەنتىنە العىس ايتىپ، اقش- تىڭ ناتيجەلى ديالوگتى جالعاستىرۋعا مۇددەلى ەكەنىن جەتكىزدى.
اڭگىمەلەسۋ بارىسىندا ەكىجاقتى قارىم-قاتىناستىڭ نەگىزگى ماسەلەلەرى تالقىلاندى. اسىرەسە، ەنەرگەتيكالىق جانە ينفراقۇرىلىمدىق جوبالاردى جۇزەگە اسىرۋعا، سيفرلىق تەحنولوگيالار مەن جاساندى ينتەللەكتىنى دامىتۋعا، سونداي- اق مەملەكەتتەر اراسىنداعى كولىك-لوگيستيكا بايلانىستارىن كەڭەيتۋگە ايرىقشا ءمان بەرىلدى.
بۇدان بولەك، قاسىم-جومارت توقايەۆ پەن كەرول ميللەر وڭىرلىك جانە حالىقارالىق كۇن تارتىبىندەگى وزەكتى ماسەلەلەر جونىندە پىكىر الماستى.
ايتا كەتەيىك، پرەزيدەنت وكىمىمەن قازاقستان حالقى اسسامبلەياسىنىڭ كەزەكتى سەسسياسى شاقىرىلدى.
