مەملەكەت 1 توننا پلاستيك قالدىققا قانشا سۋبسيديا تولەيدى
استانا. KAZINFORM - «جاسىل دامۋ» ا ق باسقارما ءتوراعاسى ەرجان سارسەنباي ورتالىق كوممۋنيكاتسيالار قىزمەتىندە وتكەن بريفينگىدە مەملەكەت پلاستيك قالدىقتى وڭدەيتىن كاسىپورىندارعا قانشا سۋبسيديا تولەيتىنىن ايتتى.
«بيىل 1 توننا پلاستيكالىق قاپتاماعا 67379 تەڭگە تولەنەدى. ونىڭ ىشىندە الىم - 33,4 مىڭ تەڭگە، تاسىمالداۋ - 27,3 مىڭ تەڭگە، ال قايتا وڭدەۋ - 6,6 مىڭ تەڭگە. 2024 -جىلى بۇل ماقساتقا (جالپى تۇرمىستىق قالدىقتى قايتا وڭدەۋگە - رەد.) 7,6 ميلليارد تەڭگە جوسپارلانعان. جاڭا ايتقانىمداي، تولەمدەردىڭ بۇكىل ءتاريفى ناقتى بەلگىلەنگەن»، - دەدى ەرجان سارسەنباي.
سونداي- اق، ول قوقىس وڭدەۋ جوبالارىنا ارنايى قور ارقىلى 3 پايىزدىق نەسيە بەرىلەتىنىن ايتتى.
«قوسىمشا قالدىقتى جيناۋ جانە قايتا وڭدەۋ تەحنولوگيالارىن ەنگىزۋگە، قايتا وڭدەيتىن زاۋىت سالۋعا، ۇيىمداردىڭ ماتەريالدىق- تەحنيكالىق بازاسىن جەتىلدىرۋگە ارنالعان جوبالارعا 200 ميلليارد تەڭگە ءبولۋ جوسپارلانعان. قارجىلاندىرۋ «ونەركاسىپتى دامىتۋ قورى» ارقىلى 3 پايىزدان اسپايتىن جىلدىق سىياقى مولشەرلەمەسىمەن 3 جىلدان 15 جىلعا دەيىنگى مەرزىمدە قايتارۋ مەحانيزمىمەن ىسكە اسادى»، - دەدى اكسيونەرلىك قوعام باسشىسى.
