مۇلدەم ماي جەمەسە نە بولادى: ونىڭ دەنساۋلىققا جاعىمسىز سالدارى

استانا. KAZINFORM - كوپشىلىكتىڭ مايلارعا دەگەن كوزقاراسى ناشار. ولار ونى جەۋگە قورقادى. سەبەبى زياندى تاماق ادەتتە مايلى تاماقپەن ۇقساستىرىلادى.

الايدا مايلاردى مۇلدەم جەمەي قويۋعا بولمايدى. راتسيوندا مايلاردىڭ جەتكىلىكسىز بولۋى اعزاعا جاعىمسىز اسەر ەتۋى مۇمكىن.

ديسبيوز جانە قابىنۋ

ماي مۇلدەم بولماسا نەمەسە ول ازايسا ءوت ءبولىنۋ زارداپ شەگەدى، سەبەبى ءوت ءبىرىنشى كەزەكتە مايلى تاماق جەگەندە بولىنەدى. وعان قوسا، ءوتتىڭ ءوزى ونىڭ قۇرىلىمىنا اسەر ەتەتىن مايلى قىشقىلداردان تۇرادى. سونداي-اق ءوت - ىشەكتەگى شارتتى-پاتوگەندى فلورانى رەتتەيتىن نەگىزگى «ساۋىقتىرۋشى» سۇيىقتىق. ول جەتىسپەگەن كەزدە ديسبيوز داميدى: ميكرواعزالار كوبەيەدى، ءىش كەبۋ جانە ىشتە جاعىمسىزدىق پايدا بولادى. وسىلايشا، ميكروفلورا جانە ىشەكتەر شىرىشتىسى بۇزىلادى، ول ءوز كەزەگىندە قابىنۋ پروتسەستەرىنە، يممۋنيتەتتىڭ تومەندەۋىنە، ماكرو-جانە ميكروەلەمەنتتەردىڭ جەتىسپەۋشىلىگىنە اكەلەدى.

جاسۋشالارعا قۇرىلىس ماتەريالدارىنىڭ بولماۋى

ەگەر اعزاعا تاماقپەن بىرگە ماي تۇسپەسە، وندا وعان ساۋ جاسۋشالار جاساۋ ءۇشىن بىرتىندەپ ليپيدتى قۇراۋىشتار جەتپەيدى. ناتيجەسىندە، بىرنەشە پروبلەما پايدا بولادى:

تەرى قۇرعاق بولىپ كەتەدى؛

مي %60 مايلاردان تۇرادى، سوندىقتان ول جەتىسپەسە، كوگنيتيۆتى قابىلەتتەر زارداپ شەگەدى: ەستە ساقتاۋ، زەيىن جانە ت. ب؛

قان تامىرلار ءالسىز بولا تۇسەدى. ولار وڭاي زاقىمدالادى، ءجيى قابىنۋ پايدا بولادى جانە اتەروسكلەروز جىلدام دامۋى مۇمكىن.

دارۋمەندەر جەتىسپەۋشىلىگى

ولاردىڭ ءبىر بولىگى مايدا ەريتىندەر - ا، د، ە جانە ك دارۋمەندەرى. سايكەسىنشە، مايلارسىز ولار اعزاعا تۇسپەيدى جانە سىڭبەيدى. ولار نە نارسەگە اكەلەدى؟ كورۋ قابىلەتى، شاش پەن تەرى جاعدايى ناشارلايدى، اعزانىڭ قورعانىش رەسۋرستارى تومەندەيدى، ەنەرگيا ازايادى جانە ونكولوگيا، وستەوپوروز سەكىلدى قاۋىپتى اۋرۋلار قاۋپى ارتادى.

رەپرودۋكتيۆتى جۇيە پروبلەمالارى

بارلىق جىنىستىق گورموندار حولەستەرين مولەكۋلالارىنان، ياعني جانۋار مايلارىنان سينتەزدەلەدى. سايكەسىنشە، ونىڭ جەتىسپەۋى رەپرودۋكتيۆتى قىزمەتتەرگە اسەر ەتەدى.

ارتىق سالماق قوسۋ

مايلار - ەنەرگيا كوزى. ولار قارىندى اشتىرماي، اعزانىڭ بەلسەندىلىگىن بىرنەشە ساعاتقا دەيىن ساقتايدى. سوندىقتان ولار جەتىسپەسە، تاماقتانعاننان كەيىن كوپ ۇزاماي قايتادان قارنىڭىز اشادى. ناتيجەسىندە، كومىرسۋلار جەي باستايسىز. جىلدام قارىن اشقاندىقتان ادام ادەتتە تاماق ساپاسى جايلى ويلامايدى، سوندىقتان ءتاتتى، ءدامدى، زياندى بىردەڭە جەگەندى ءجون كورەدى. الايدا، ءبىر ساعاتتان سوڭ اعزا قايتادان جاڭا تىسكەباسار سۇرايدى. سونىڭ سالدارىنان ارتىق سالماق قوسىپ الاسىز.

massaget.kz