مەكتەپتەگى تاماقتاندىرۋ: اكىمشىلىك جاۋاپكەرشىلىك ەنۋى مۇمكىن

استانا. KAZINFORM - وقۋ-اعارتۋ مينيسترلىگى مەكتەپتە تاماقتاندىرۋ قىزمەتتەرىن ساتىپ الۋ كەزىندە ءونىم بەرۋشىلەردى ىرىكتەۋ تالاپتارىن بۇزعانى ءۇشىن لاۋازىمدى تۇلعالارعا اكىمشىلىك جاۋاپكەرشىلىك ەنگىزۋ ماسەلەسىن پىسىقتاۋدا. بۇل تۋرالى سالا ءمينيسترى عاني بەيسەمبايەۆ ايتتى.

قىركۇيەك- قازان ايلارىندا ەلىمىزدەگى مەكتەپ اسحانالارىنىڭ سانيتاريالىق ەپيدەميولوگيالىق تالاپتارعا سايكەستىگىنە مونيتورينگ جۇرگىزىلگەن.

«رەسپۋبليكالىق مونيتورينگ قورىتىندىسى مەكتەپتەگى تاماقتاندىرۋ ساپاسىنا قاتىستى اتقارۋشى ورگاندار باقىلاۋىنىڭ ءالى دە جەتكىلىكسىزدىگىن كورسەتىپ وتىر، بۇل زاڭناما تالاپتارىنىڭ بۇزىلۋ فاكتىلەرىنەن دە بايقالىپ وتىر. دالىرەك ايتقاندا، مونيتورينگ بارىسىندا 771 بۇزۋشىلىق انىقتالعانىن اتاپ وتكىم كەلەدى»، - دەدى مينيستر بۇگىنگى ۇكىمەت وتىرىسىندا.

سونداي-اق، مينيسترلىك مەكتەپتە تاماقتاندىرۋدى ۇيىمداستىرۋ بويىنشا جەرگىلىكتى اتقارۋشى ورگانداردىڭ جۇمىسىنا كەشەندى باعالاۋ جۇرگىزگەن. باعالاۋ كەزىندە تاماقتاندىرۋ ساپاسىنا جۇرگىزىلگەن مونيتورينگ ناتيجەلەرى، اسحانالاردىڭ قاجەتتى ماتەريالدىق- تەحنيكالىق جابدىقتالۋى، 1 وقۋشىعا شاققانداعى وڭىرلەردەگى تاماقتانۋ قۇنى، اتا-انالار اراسىندا جۇرگىزىلگەن ساۋالناما ناتيجەلەرى ەسكەرىلدى.

«ماسەلەن، جامبىل، ماڭعىستاۋ، الماتى، اتىراۋ وبلىستارىنىڭ جانە شىمكەنت قالاسى اكىمدىكتەرىنىڭ تاراپىنان مەكتەپتەردە ساپالى تاماقتانۋدى ۇيىمداستىرۋعا ءتيىستى كوڭىل بولىنبەي وتىرعانى انىقتالدى. بۇل اتالعان وڭىرلەردەگى اكىمدىكتەردىڭ تاماقتاندىرۋ ساپاسىنا ەرەكشە نازار اۋدارىپ، باقىلاۋدى كۇشەيتۋ قاجەتتىگىن كورسەتەدى. قازىرگى كۇنى مينيسترلىك مەكتەپتە تاماقتاندىرۋ قىزمەتتەرىن ساتىپ الۋ كەزىندە ءونىم بەرۋشىلەردى ىرىكتەۋ تالاپتارىن بۇزعانى ءۇشىن لاۋازىمدى تۇلعالارعا اكىمشىلىك جاۋاپكەرشىلىك ەنگىزۋ ماسەلەسىن پىسىقتاۋدا»، - دەدى وقۋ-اعارتۋ ءمينيسترى.

بۇعان دەيىن مەملەكەت باسشىسى قاسىم-جومارت توقايەۆ اۋىل شارۋاشىلىعى قىزمەتكەرلەرىنىڭ ءبىرىنشى فورۋمىندا مەكتەپ اسحاناسىنداعى تاماق ساپاسىن ارتتىرۋ باعىتىنداعى ۇستانىمدارىن ايتقان ەدى.

ەل مەكتەپتەرىندە 1,7 ميلليون بالا تەگىن ىستىق تاماقپەن قامتىلعان.

اۆتور
ايجان سەرىكجان قىزى