مەكتەپتەگى بۋللينگ: ورالدا بىرنەشە پەداگوگ پەن اتا-انالار جاۋاپقا تارتىلدى

ورال قالاسىندا وقۋشىنىڭ بۋللينگكە ۇشىراۋ فاكتىسى بويىنشا بىرنەشە اتا-انا جانە مۇعالىمدەر جاۋاپقا تارتىلدى، دەپ حابارلايدى Kazinform.

مەكتەپ وقۋشىسىنىڭ ءبىرى ەكىنشىسىنە سەس كورسەتىپ، بەتىنەن ۇرعانى تۇسىرىلگەن ۆيدەو الەۋمەتتىك جەلىدە تارادى.

ب ق و ءبىلىم باسقارماسىنىڭ باسپا ءسوز قىزمەتى الىمجەتتىك وقيعاسى 13-قاراشا كۇنى ساعات 07.50-دە زاچاگان كەنتىندەگى №38-مەكتەپ-ليتسەيىنىڭ ەكىنشى قاباتىندا ورنالاسقان دەنە شىنىقتىرۋ بولمەسىندەگى اجەتحانادا بولعانىن ءمالىم ەتتى.

«ورال قالالىق ءبىلىم بەرۋ ءبولىمىنىڭ اقپاراتىنا سايكەس، جابىرلەنگەن وقۋشىنىڭ اتا- اناسى 6-جەلتوقسان كۇنى مەكتەپ اكىمشىلىگىنە ورىن العان جاعدايدى حابارلاپ، شارا قولدانۋدى سۇراعان. سول كۇنى مەكتەپ اكىمشىلىگى جانە شاعان پوليتسيا ءبولىمىنىڭ قىزمەتكەرى سىنىپ وقۋشىلارىمەن جانە اتا- انالارمەن ءمان-جايدى انىقتاۋ ءۇشىن جينالىس ۇيىمداستىرىپ، تۇسىنىك جۇمىستارىن جۇرگىزدى. مەكتەپ اكىمشىلىگى وقۋشىلار اراسىندا قۇقىق بۇزۋشىلىققا جول بەرگەنى ءۇشىن سىنىپ جەتەكشىلەرىنە تارتىپتىك شارا قولداندى. ورال قالالىق ءبىلىم بەرۋ ءبولىمى كوميسسيا قۇرىپ، 8-جەلتوقساندا №38 مەكتەپ-ليتسەيىندە تەكسەرۋ جۇرگىزىلەدى. جاعداي باقىلاۋعا الىندى»، - دەلىنگەن رەسمي حابارلامادا.

ال ب ق و پوليتسيا دەپارتامەنتىنىڭ باسپا ءسوز قىزمەتى ۇسىنعان اقپاراتقا سۇيەنسەك، كۇش كورسەتكەن بالالاردىڭ اتا-انالارى جاۋاپقا تارتىلدى.

«6-جەلتوقسان كۇنى شاعان پوليتسيا ءبولىمىنىڭ كامەلەتكە تولماعاندار ىستەرى جونىندەگى ينسپەكتورلارى اتالعان مەكتەپتە تەكسەرۋ جۇرگىزدى. سونىڭ بارىسىندا 15 جاستاعى 9-سىنىپ وقۋشىسىنىڭ 8-سىنىپتا وقيتىن 13 جاسار بالانىڭ بەتىنەن شاپالاقپەن ۇرعانى انىقتالدى. اتالعان دەرەك شاعان پوليتسيا بولىمىندە تىركەلدى.

تەكسەرۋ ناتيجەسىندە 9-سىنىپ وقۋشىسىنىڭ اتا-اناسىنا قاتىستى ق ر اكىمشىلىك قۇقىقبۇزۋشىلىق تۋرالى كودەكسىنىڭ 435-بابىنا سايكەس اكىمشىلىك حاتتاما تولتىرىلدى.

ال ۆيدەوعا ءتۇسىرىپ تۇرعان 2010 -جىلى تۋعان وقۋشىنىڭ اتا- اناسىنا قاتىستى اتالعان كودەكستىڭ 127-بابىنا سايكەس اكىمشىلىك حاتتاما تولتىرىلدى. وقۋشىلارمەن جانە ولاردىڭ اتا- انالارىمەن ءتۇسىندىرۋ جۇمىستارى جۇرگىزىلدى»، - دەپ حابارلادى ۆەدومستۆودان.

الىمجەتتىك كورگەن بالانىڭ اكەسى جانىبەك تولەپبەرگەنوۆتىڭ ايتۋىنشا، بالاسىنىڭ بۋللينگكە ۇشىراپ جۇرگەنىن Instagram-دا جاريالانعان ۆيدەودان بىلگەن.