مەكتەپتەگى «العاشقى اسكەري دايىندىق» ءپانىنىڭ اتاۋى مەن مازمۇنى وزگەرەدى

استانا. KAZINFORM - مەكتەپتەگى «العاشقى اسكەري جانە تەحنولوگيالىق دايىندىق» ءپانىنىڭ اتاۋى مەن مازمۇنى وزگەرەدى. بۇل تۋرالى قورعانىس مينيسترلىگى اسكەري ءبىلىم جانە عىلىم دەپارتامەنتىنىڭ باستىعى، پولكوۆنيك مۇرات ولجابايەۆ ايتتى.

- ءبىلىم بەرۋ ۇيىمدارىندا اسكەري ءىس نەگىزدەرىن وقىتۋدىڭ مىندەتتى ءپانى - باستاپقى اسكەري جانە تەحنولوگيالىق دايىندىق. قورعانىس مينيسترلىگى ءبىلىم بەرۋ ۇيىمدارىندا باستاپقى اسكەري دايىندىقتى ۇيىمداستىرۋعا جەرگىلىكتى اسكەري باسقارۋ ورگاندارى ارقىلى كومەك كورسەتەدى. بۇل ورگاندار باس شتابتىڭ ۇيىمداستىرۋ- جۇمىلدىرۋ جۇمىستارى دەپارتامەنتىنە تىكەلەي باعىنادى، - دەدى ول ورتالىق كوممۋنيكاتسيالار قىزمەتىندەگى بريفينگتە.

ونىڭ اتاپ وتۋىنشە، بۇگىندە ءماجىلىس دەپۋتاتتارى باستاپقى اسكەري جانە تەحنولوگيالىق دايىندىق ءپانىنىڭ وقىتۋشىلارىنا قويىلاتىن تالاپتاردى كۇشەيتۋ بويىنشا ۇسىنىستار ەنگىزدى. اتاپ ايتقاندا، ولار اسكەري قىزمەت وتكەرۋ نەمەسە اسكەري كافەدرادا وقۋ تاجىريبەسىنىڭ بولۋى مىندەتتى دەپ تانۋدى ۇسىنىپ وتىر. وسىعان بايلانىستى، قولدانىستاعى زاڭناماعا وزگەرىستەر مەن تولىقتىرۋلار ەنگىزۋ جۇمىستارى جۇرگىزىلۋدە. قازىرگى ۋاقىتتا زاڭ جوباسى ماجىلىستە قارالۋدا جانە ءبىرىنشى وقىلىمنان ءوتتى.

- قورعانىس مينيسترلىگى «العاشقى اسكەري جانە تەحنولوگيالىق دايىندىق» ءپانىنىڭ وقۋ باعدارلاماسىن «وتان قورعاۋشى» دەپ وزگەرتۋ جونىندە پيلوتتىق جوبا ۇسىندى. سونىمەن قاتار، وسى ءپاننىڭ تاقىرىپتىق جوسپارى ازىرلەندى، - دەدى دەپارتامەنت باستىعى.

مۇرات ولجابايەۆتىڭ دەرەگىنشە، جاڭا وقۋ باعدارلاماسىنا مىناداي بولىمدەر ەنگىزىلەدى:

• مەملەكەتتىڭ قاۋىپسىزدىگى مەن قورعانىسىنىڭ قۇقىقتىق نەگىزدەرى

• قارۋلى كۇشتەر جانە اسكەري دوكترينا

• اسكەري دايىندىق نەگىزدەرى

• اسكەري قىزمەت نەگىزدەرى

• اقپاراتتىق قاۋىپسىزدىك نەگىزدەرى

• اسكەري روبوتتار جانە جاساندى ينتەللەكت

• ءومىر قاۋىپسىزدىگىنىڭ نەگىزدەرى

• وقۋ- دالا مودۋلى

- «وتان قورعاۋشى» ءپانىنىڭ جاڭا وقۋ باعدارلاماسىن ەنگىزۋ 2026-2027 وقۋ جىلدارىنا جوسپارلانعان. قازىرگى ۋاقىتتا ول وقۋ-اعارتۋ مينيسترلىگىندە تالقىلاۋ كەزەڭىندە، - دەدى ول.

بۇعان دەيىن بيىل باۋىرجان مومىش ۇلى مەن تالعات بيگەلدينوۆ اتىنداعى اسكەري كوللەدجدەر اشىلاتىنىن جازعان ەدىك.