مەكتەپتە سمارتفونداردى ارنايى سومكەگە سالۋعا ماجبۇرلەۋدە

مەكتەپ وقۋشىلارىنا ساباقتا تەلەفون ۇستاۋعا رۇقسات بەرۋ ماسەلەسى كوپتەگەن ەلدە تالقىلانۋدا. بريتاندىق وقۋ جۇيەسىندەگى ەليتالى مەكتەپتەر مەن مەملەكەتتىك مەكتەپتەردە سمارتفون ۇستاۋدا شەكتەۋلەر ەنگىزىلە باستادى. مۇنداي تىيىم باسقا ەلدەردە دە بار.

دجون ۋولليس اكادەمياسىنىڭ وقۋشىلارى تەلەفوندارىن ەندى وسىنداي قالتالاردا ساقتايدى.

BBC News جاقىندا تاعى ءبىر بريتاندىق وقۋ ورنى وقۋشىلاردىڭ سمارتفوندارىن مەكتەپتە ارنايى قالتالارعا سالعىزۋ تۋرالى شەشىم قابىلداعانىن حابارلادى. Aikyn.kz ارنايى سومكەگە سالىنعان تەلەفوندى بالالار وقۋ كەزىندە نەگە قولدانا المايتىنىن تۇسىندىرەدى.

لوندوننان 100 شاقىرىم جەردە ورنالاسقان ەشفور قالاشىعىنداعى (كەنت گرافتىگى) اكادەميانىڭ وقۋشىلارى ساباق كەزىندە ۇيالى تەلەفوندارىن قولدانباي جابىق سومكەگە سالىپ جۇرۋلەرى ءتيىس. دجون ۋولليس اكادەمياسى بۇل شارانى جاڭا جىلدان باستاپ ەنگىزبەكشى. اكادەميا ديرەكتورى دەميان ماكبيتتىڭ ايتۋىنشا، بۇل ەرەجە مەكتەپتەگى قاۋىپسىزدىكتى قامتاماسىز ەتۋ ماقساتىندا قابىلدانعان. ماكبيت مىرزا اكادەميانىڭ سمارتفونداردى سومكەلەرگە سالۋ ەرەجەسى كەنتتەگى العاشقى مەكتەپ بولاتىنىن ايتقان.

ول: «بۇل بارلىق مەكتەپتەردىڭ الدىندا تۇرعان جانە شەشۋگە ءتيىستى ماسەلە. مەنىڭ ويىمشا، ءبىز ارنايى سومكەلەردى تەلەفونداردى وقۋشىلاردان تارتىپ الماي- اق شەكتەۋگە مۇمكىندىك بەرەتىن ءادىس دەپ ويلايمىن».

اكادەميا ماتەماتيكا مەن ەسەپتەۋىش تەحنيكاسىنا ماماندانعان، اتاقتى اعىلشىن ماتەماتيگى دجون ۋولليستىڭ اتىمەن اتالعان. 2012 -جىلى رەسمي تۇردە 3 پەن 19 جاس ارالىعىنداعى بالالارعا ارنالعان اكادەمياعا اينالدى، ول باستاۋىش جانە ورتا مەكتەپ جاسىنداعى وقۋشىلاردى وقىتادى. اكادەميادا 1400 وقۋشى ءبىلىم الادى.

جاڭا جىلدان كەيىن اكادەميانىڭ ءاربىر وقۋشىسى مەكتەپكە كىرگەندە تەلەفونىن سومكەسىنە سالۋعا مىندەتتى. بۇدان كەيىن سمارتفون بۇعاتتالىپ، ماگنيتتىك تەكسەرۋدەن وتكىزىلەدى.

اكادەميا ديرەكتورى: «كەيبىر وقۋشىلار ءوز قۇرىلعىسىنا تاۋەلدى بولىپ، ۇيدەگى اتا-اناسىمەن نەمەسە باسقا بىرەۋمەن ۇنەمى بايلانىستا بولۋ قاجەت دەپ ويلايدى. بۇل شەشىمدى قولداپ: «اقىرى بۇل شەشىم قابىلداندى-اۋ. راقمەت» دەگەن وقۋشىلار دا كوپ بولدى. ويتكەنى ولار مەكتەپكە ءبىلىم الۋ ءۇشىن كەلگەندەرىن جاقسى تۇسىنەدى. مەكتەپ وقۋشىلارى ءبىلىم الاتىن جانە دوستارىمەن جۇزبە-ءجۇز ارالاساتىن ورىن بولۋى كەرەك»، - دەپ تۇسىنىكتەمە بەرگەن.

ءبىلىم مينيسترلىگىنىڭ (DfE) وكىلى: «ءبىز دجون ۋولليس اكادەمياسىنىڭ مەكتەپتەگى ۇيالى تەلەفوندارعا تىيىم سالۋىن قولدايمىز، وسىلايشا وقۋشىلار وزدەرىن الاڭداتاتىن نارسەلەردەن ارىلىپ، تەك وقۋعا كوڭىل بولەدى جانە وسەدى. ديرەكتورلار ولاردىڭ مەكتەپتەردە ۇيالى بايلانىسقا تىيىم سالۋ شەشىمدەرىنە DfE قولداۋ كورسەتەتىنىنە سەنىمدى بولۋى كەرەك»، - دەگەن مالىمدەمە تاراتقان.

Aikyn.kz ۇلى بريتانيا كورولى كارل III وقىعان شوتلاندياداعى مەكتەپ-ينتەرنات سمارتفونداردى پايدالانۋعا تىيىم سالعانى تۋرالى ماتەريال جاريالاعان ەدى. گوردونستوۋن وقۋشىلارى كۇندىز تەلەفوندارىن ينتەرنات ۇيىندە قالدىرىپ، تۇندە قىزمەتكەرلەرگە تاپسىراتىن بولعان. وقۋشىلارعا تەلەفوندارىن ساباقتان كەيىن بىرنەشە ساعات بوس ۋاقىتىندا عانا قولدانۋعا رۇقسات بەرىلەدى.

قازاق ەلىنىڭ مەكتەپتەرىندە دە تەلەفون قولدانۋدى شەكتەۋدى ەنگىزەتىن ۋاقىت جاقىنداعان سياقتى. وقۋشىلار بوتەن قۇرالدارعا الاڭداماي، ءبىلىم الۋعا عانا كوڭىل ءبولۋى ءۇشىن بريتان مەكتەپتەرىندەگىدەي شەشىمدەردى قابىلداۋ كەرەك شىعار. ءسىز قالاي ويلايسىز؟