مەكتەپ ءبىتىرۋ كەشىندە بالالاردىڭ قاۋىپسىزدىگىنە ەرەكشە نازار اۋدارۋ قاجەت - ۇكىمەت باسشىسى
استانا. KAZINFORM - ۇكىمەت باسشىسى ولجاس بەكتەنوۆ بالالاردىڭ قاۋىپسىزدىگى مەن جازعى دەمالىستى ۇيىمداستىرۋ ماسەلەسىن كوتەردى.
- بيىل 200 مىڭنان استام بالا مەكتەپ بىتىرەدى. مىندەت ايقىن. بارلىق ەمتيحاندى، ۇلتتىق ءبىرىڭعاي تەستىلەۋدى، بالالاردىڭ جازعى دەمالىسى مەن ساۋىقتىرۋ شارالارىن جوعارى دەڭگەيدە ۇيىمداستىرۋ كەرەك. تەستىلەۋ مەن ەمتيحان كەزىندە، «سوڭعى قوڭىراۋ» جانە مەكتەپ ءبىتىرۋ كەشتەرىندە بالالاردىڭ قاۋىپسىزدىگىن قامتاماسىز ەتۋگە ەرەكشە نازار اۋدارۋ قاجەت. ويتكەنى، ءدال وسى كەزەڭدە ءتۇرلى كەلەڭسىز جاعدايلاردىڭ قاۋپى ارتا تۇسەدى. اتا- انالارعا ايتارىم، مەكتەپ ءبىتىرۋ كەشتەرىندە، ەڭ باستىسى جازعى دەمالىس كەزىندە بالالاردى قاراۋسىز قالدىرماعان ءجون. وسىعان باسا كوڭىل ءبولۋدى سۇرايمىن، - دەدى ولجاس بەكتەنوۆ ۇكىمەت وتىرىسىندا.
ودان ءارى پرەمەر- مينيستر بالا ءومىرى مەن تاربيەسىندەگى اتا-انانىڭ رولىنە توقتالدى.
- اتا- انانىڭ ايالى الاقانى مەن مەيىرىمى بالانىڭ جانىن جاقسىلىققا بولەيدى. ولاردىڭ بويىنداعى ادامگەرشىلىك نەگىزدەرى، قوعامدىق ورتاداعى ءىس- ارەكەتى مەن وتانشىلدىق قاسيەتتەرىنىڭ بارلىعى، ءبىرىنشى كەزەكتە وتباسىندا قالىپتاسادى. ەشقانداي مينيسترلىك اتا- انا قامقورلىعى مەن تاربيەسىن الماستىرا المايدى. ەلىمىزدىڭ لايىقتى ازاماتتارىن تاربيەلەۋ - مەملەكەت پەن قوعامنىڭ بىرلەسكەن ۇلكەن ەڭبەگىنىڭ جەمىسى. سوندىقتان سانالى، ءبىلىمدى جانە ناعىز وتانشىل ازاماتتاردى قالىپتاستىرۋدا كۇش- جىگەرىمىزدى نىعايتا تۇسەيىك دەگىم كەلەدى، - دەيدى و. بەكتەنوۆ.
