مەكتەپ بۋحگالتەرلەرى اقشانى كوبىندە وسى 5 ءادىس ارقىلى جىمقىرادى

استانا. KAZINFORM - انتيكور مەكتەپ بۋحگالتەرلەرىنىڭ قارجى جىمقىرۋ سحەمالارىنا شولۋ جاسادى.

سىبايلاس جەمقورلىققا قارسى قىزمەت ءبىلىم سالاسىنداعى جەمقورلىق تاۋەكەلدەرىنە سىرتقى تالداۋ جۇرگىزگەن.

سول ارقىلى ەڭبەكاقى تولەۋ قورىنان قاراجات جىمقىرۋدىڭ تۇراقتى قىلمىستىق سحەمالارىن اشتى:

قىزمەتكەرلەرگە جالاقى ونىڭ لاۋازىمىنا قاراعاندا الدەقايدا كوپ اۋدارىلعان؛

جالاقى ءبىلىم مەكەمەلەرىندە رەسمي تۇردە تىركەلمەگەن ادامدارعا بەرىلگەن؛

قىزمەتكەردىڭ كارت-شوتتارىنا جالاقى ەسەپتەلىپ، ال تولەم قۇجاتىندا باسقا تۇلعانىڭ دەرەكتەرى كورسەتىلگەن؛

ءبىر ادامعا اقشا اۋدارىمدارىن بىرنەشە رەت قايتالاعان؛

«ءولى جاندارعا» - تۋىستارى مەن جاقىندارىنا اقشا اۋدارعان.

بۋحگالتەرلەر مەكتەپتىڭ بۋحگالتەرلىك ەسەپ جۇيەلەرى، ۇلتتىق ءبىلىم بەرۋ بازاسى جانە «قازىناشىلىق-كليەنت» جۇيەسى اراسىندا ينتەگراتسيا جوقتىعىن پايدالانعان.

ولار تولەم قۇجاتتارىنا قولمەن تۇزەتۋ ەنگىزىپ، بيۋجەت اقشاسىن جىمقىرعان.

جىل سايىنعى بيۋجەتتىك وتىنىمدەردى قالىپتاستىرۋ كەزىندە جىمقىرىلاتىن قاراجات بەلگىلەنگەن.

ايتا كەتۋ كەرەك، جىمقىرۋ بويىنشا بۇرىن اشىلعان سحەمالار شەڭبەرىندە سوتقا دەيىنگى تەرگەۋدى بۇگىندە باسقا قۇقىق قورعاۋ ورگاندارى جۇرگىزىپ جاتىر.

ەسكە سالا كەتەيىك، بۇگىن انتيكور تۇركىستان وبلىسىنىڭ ەكى اۋدانىندا ءبىلىم سالاسىندا ءبىر جىلدا 3,7 ميلليارد تەڭگە جىمقىرىلعانىن حابارلاعان ەدى.

سونداي-اق، قىزىلوردا وبلىسىنىڭ جاڭاقورعان اۋدانىندا ءبىلىم ءبولىمىنىڭ باستىعى سىبايلاستارىمەن بىرگە سوتتالدى.