مەكتەپ اسحانالارىن ازىق-تۇلىكپەن قامتاماسىز ەتۋ ەرەجەسىن جەتىلدىرۋ كەرەك - دەپۋتات

استانا. KAZINFORM - مەكتەپ اسحانالارىنا جەتكىزىلەتىن تاعام ونىمدەرىنىڭ ساپاسى مەن ولاردىڭ جارامدىلىق مەرزىمىن باقىلاۋدى كۇشەيتۋ قاجەت. بۇل تۋرالى ءماجىلىستىڭ جالپى وتىرىسىندا دەپۋتات ناتاليا دەمەنتيەۆا ءمالىم ەتتى.

«پرەمەر-مينيستر ماڭعىستاۋ وبلىسىندا وقۋشىلاردىڭ ۋلانۋى وقيعاسىنا بايلانىستى ماسەلەنى ءوزىنىڭ باقىلاۋىنا الىپ، مەكتەپ اسحانالارىندا سانيتارلىق-ەپيدەميولوگيالىق قىزمەتتىڭ تەكسەرۋ جۇمىستارىن جۇرگىزۋدى مىندەتتەدى. «AMANAT» پارتياسىنىڭ فراكسيا مۇشەلەرى تاراپىنان اتالعان ماسەلە ۇنەمى كوتەرىلىپ كەلەدى. ءبىراق، جاۋاپتى ۆەدومستۆا وكىلدەرى دە، جەرگىلىكتى اتقارۋشى ورگاندار دا سالعىرتتىق تانىتىپ جاتىر. قازىرگى كەزدە سانيتارلىق-ەپيدەميولوگيالىق قىزمەت مەكتەپ اسحانالارىن جۇيەلى تۇردە تەكسەرە الماي وتىر. سەبەبى، شاعىن جانە ورتا بيزنەستى تەكسەرۋگە موراتوري جاريالانعان كەزەڭدە، اسحانالار ۇزاق ۋاقىت بويى تەكسەرۋدەن وتپەگەن. قازىر ماراتوري الىنىپ تاستالدى. وسىعان بايلانىستى سانيتارلىق-ەپيدەميولوگيالىق قىزمەتتىڭ مەكتەپ اسحانالارىن تۇراقتى تۇردە تەكسەرۋىن قامتاماسىز ەتۋ قاجەت. ۋلانۋ جاعدايلارى ورىن العان كەزدە، سانيتارلىق- ەپيدەميولوگيالىق قىزمەت جاۋاپكەرشىلىگى دە قاراستىرىلسىن»، - دەدى ن. دەمەنتيەۆا ۇكىمەت باسشىسىنىڭ ورىنباسارى تامارا دۇيسەنوۆانىڭ اتىنا جولداعان ساۋالىندا.

ونىڭ ايتۋىنشا، مەكتەپ اسحانالارىنا جەتكىزىلەتىن تاعام ونىمدەرىنىڭ ساپاسى مەن ولاردىڭ جارامدىلىق مەرزىمىن باقىلاۋدى كۇشەيتۋ قاجەت.

ۆەتەرينارلىق جانە سانيتارلىق باقىلاۋ جۇيەلەرىنىڭ تيىمدىلىگىن ارتتىرۋ ماقساتىندا مەكتەپ اسحانالارىنا جەتكىزىلەتىن ونىمدەردىڭ قايدان الىنعانى، ونىڭ ىشىندە ەت پەن ءسۇت ونىمدەرىنىڭ ناقتى قاي شارۋاشىلىقتان نەمەسە بازاردان جەتكىزىلگەنى تۋرالى اقپاراتتىڭ اشىقتىعىن قامتاماسىز ەتۋ كەرەك.

بۇل رەتتە، ازىق-تۇلىك ونىمدەرىنىڭ ساپاسى، قاۋىپسىزدىگى جانە ساقتاۋ مەرزىمىنە بايلانىستى تالاپتار قاتاڭ ساقتالۋى ءتيىس. جاۋاپتى ورگاندار مەكتەپتەرگە جەتكىزىلەتىن بارلىق تاعام ونىمدەرىنىڭ سەرتيفيكاتتالۋىن جانە ولاردىڭ ساپاسىن جۇيەلى تۇردە تەكسەرۋدى قامتاماسىز ەتۋى ءتيىس.

وسى ءىس-شارالار ۇكىمەت دەڭگەيىندە رەتتەلىپ، ۆەتەرينارلىق باقىلاۋ جۇيەسىنە قوسىمشا تالاپتار ەنگىزىلۋى قاجەت.

«مەكتەپ اسحانالارىن تاماقپەن قامتاماسىز ەتۋگە ارنالعان مەملەكەتتىك ساتىپ الۋ ەرەجەلەرىن جەتىلدىرۋ وزەكتى. قازىرگى كەزدە بۇل سالادا مونوپولياعا جول بەرمەس ءۇشىن مەكتەپتەرگە ارنالعان تەندەرلەردە اشىقتىق پەن باسەكەلەستىكتى قامتاماسىز ەتەتىن تالاپتاردى كۇشەيتۋ كەرەك. اتاپ ايتقاندا، مەملەكەتتىك ساتىپ الۋلار تۋرالى ەرەجەگە مەكتەپ اسحانالارى ءۇشىن تاماق ونىمدەرىن جەتكىزۋ بويىنشا تەندەرگە قاتىساتىندارعا قويىلاتىن تالاپتاردى ناقتىلاپ، 1 كومپانيانىڭ نەشە مەكتەپتە تەندەر ۇتىپ الۋ مۇمكىندىگىن شەكتەۋگە بايلانىستى وزگەرىستەر ەنگىزۋ قاجەت. ساتىپ الۋ پروتسەسىنىڭ تيىمدىلىگى مەن اشىقتىعىن قامتاماسىز ەتۋ ءۇشىن قارجىلىق باقىلاۋدى كۇشەيتىپ، مەردىگەرلەردىڭ جاۋاپكەرشىلىگىن ارتتىرۋ جونىندە شارالار قابىلداۋ كەرەك»، - دەدى دەپۋتات.

ەسكە سالايىق، 6-قىركۇيەك كۇنى مۇنايلى اۋدانى بەسشوقى اۋىلىندا №8-مەكتەپتىڭ باستاۋىش سىنىپتارىندا وقيتىن وقۋشىلار استان ۋلانىپ قالدى.

وسى وقيعاعا قاتىستى قىلمىستىق ءىستى بىرلەسكەن جۇمىس توبى تەرگەپ جاتىر. ونىڭ قۇرامىندا پوليتسيا، ەكونوميكالىق تەرگەۋ دەپارتامەنتى مەن پروكۋراتۋرا قىزمەتكەرلەرى بار.

اۆتور
رۋسلان عابباسوۆ