مەككەدە قاسيەتتى قۇران مۇراجايى اشىلدى
استانا. KAZINFORM - كەلۋشىلەر سيرەك كەزدەسەتىن قولجازبالار جيناعىن، قاسيەتتى قۇراننىڭ تاريحي كوشىرمەلەرىن جانە عاسىرلار بويى قاسيەتتى ماتىندەردىڭ ساقتالۋىن بەينەلەيتىن ينتەراكتيۆتى كورنەكى ەكسپوزيتسيالاردى زەرتتەي الادى، دەپ حابارلايدى Kazinform ءتىلشىسى.
مەككە ايماعى گۋبەرناتورىنىڭ ورىنباسارى حانزادا ساۋد بين ميشاال بين ابدۋلازيز سارسەنبىدە حيرا مادەني اۋدانىنداعى باستى كورنەكى ورىن قۇران مۇراجايىن سالتاناتتى تۇردە اشتى. اتالعان ورتالىق مەككە تۇرعىندارى مەن قوناقتارىنىڭ ءدىني جانە مادەني تاجىريبەسىن بايىتۋعا ارنالعان، دەپ حابارلايدى Asharq Al-Awsat.
مەككە قالاسى مەن قاسيەتتى ورىندار جونىندەگى كورولدىك كوميسسيانىڭ باسشىلىعىمەن جانە قولداۋىمەن ازىرلەنگەن رۋحاني مۇراجاي ءبىلىمدى زاماناۋي تەحنولوگيالارمەن ۇيلەستىرەدى، دەپ جازادى Saudi Press Agency.
مۇراجايدا سيرەك كەزدەسەتىن قولجازبالار، قۇراننىڭ تاريحي قولجازبالارى قويىلعان. سونىمەن قوسا ينتەراكتيۆتى ۆيزۋالدى ەكسپوزيتسيالار دا بار. ولار كەلۋشىلەرگە قۇراندى جازۋ پروتسەسى قالاي جۇرگىزىلگەنىن جانە وعان عاسىرلار بويى كۇتىم جاساۋدىڭ قىر-سىرىن بىلۋگە مۇمكىندىك بەرەدى.
مۇراجايدىڭ سالتاناتتى اشىلۋى تاريحي ورىنداردى دايىنداۋ جانە جانداندىرۋ، سونداي-اق مادەني جوبالاردى ازىرلەۋ جونىندەگى كورولدىك كوميسسيانىڭ كۇش-جىگەرىنىڭ ارقاسىندا ءوتتى.
ايتا كەتەيىك، مۇراجاي حيرا مادەني اۋدانىنىڭ جوباسى اياسىندا حيرا تاۋىنىڭ ەتەگىندە ورنالاستىرىلدى. بۇل مەكەننىڭ تاريحي جانە رۋحاني ماڭىزى زور. سەبەبى ول قۇران العاش رەت تۇسىرىلگەن جەر رەتىندە تانىمال.
