مەحيكودا ديماشتى جانكۇيەرلەرى ەرەكشە قوشەمەتپەن قارسى الدى
استانا. قازاقپارات - مەحيكو اۋەجايىندا قازاقستاندىق ءانشى ديماش قۇدايبەرگەندى جانكۇيەرلەرى ەرەكشە ىقىلاسپەن قارسى الدى. الەمگە ايگىلى قازاقستاندىق ءانشى العاش رەت مەكسيكادا جەكە كونسەرت بەرۋ ءۇشىن باردى. بۇل تۋرالى Dimashnews سايتى جازدى.
مەكسيكادان جانە باسقا دا ەلدەردەن كەلگەن Dears ۇزىننان-ۇزاق «قۇرمەت ءدالىزىن» جاساپ، سۇيىكتى ارتىستەرىن شات كوڭىلمەن قارسى الۋعا دايىندالدى. ءاربىر ۇشىپ كەلۋ زالىنىڭ ەسىگى اشىلعان سايىن، جانكۇيەرلەر ءداستۇرلى مەكسيكالىق اندەردى شىرقاپ تۇردى.
ديماش كورىنگەن ساتتە سەزىمگە تولى قۋانىش بارلىق جانكۇيەرلەردى باۋراپ الىپ، Dears ونى قورشاي قارسى الىپ، كوپتەن كۇتكەن قوناقتى قۇشاق جايا قارسى الدى.
«ديماش! ديماش!» دەپ ۇرانداتىپ، يسپان تىلىندە ءان شىرقاعان كوتەرىڭكى كوڭىلدەگى جانكۇيەرلەر ءارتىستى اۋەجاي زالىندا بىرگە ەرتىپ ءجۇردى.
سول جەردە، اۋەجايدا، جانكۇيەرلەر ديماشقا TopTenMusicAward سىيلىعىنىڭ «جىل داۋىسى» نوميناتسياسىنداعى كۋبوگىن تابىستادى.
ال 8-قازان كۇنى ديماش مەحيكوداعى ايگىلى Auditorio Nacional ساحناسىندا «Stranger» تۋرىنىڭ العاشقى جەكە كونسەرتىن وتكىزەدى. ال 10-قازاندا ونەرىن Palacio de los Deportes ساحناسىندا جالعاستىرادى.
ايتا كەتەيىك، بۇعان دەيىن ديماش قۇدايبەرگەن نيۋ-يوركتىڭ ايگىلى ارەناسىندا جەكە كونسەرتىن بەردى.
