ەمحانانىڭ ديرەكتورى، باس ەسەپشى مەن شارۋاشىلىق مەڭگەرۋشىسى سوتتالدى

اتىراۋ. KAZINFORM - اتىراۋدا ەمحانانىڭ ديرەكتورى، باس ەسەپشى مەن شارۋاشىلىق مەڭگەرۋشىسى بيۋدجەت قارجىسىن جىمقىرعانى ءۇشىن سوتتالدى. ولارمەن سىبايلاس بولعان كاسىپكەرگە دە سوت ۇكىمى شىقتى.

سىبايلاس جەمقورلىققا قارسى ءىس-قيمىل اگەنتتىگىنىڭ باسپا ءسوز قىزمەتىنەن ءمالىم ەتكەندەي، 26-تامىزداعى سوت ىسىنە ونلاين رەجيمدە وبلىستىق دەنساۋلىق ساقتاۋ باسقارماسىنىڭ جانە 28 ۆەدومستۆولىق مەكەمەنىڭ قىزمەتكەرلەرى قوسىلعان.

«اتىراۋ قالاسىنىڭ سوتى №4-اتىراۋ قالالىق ەمحاناسىنىڭ ديرەكتورى ە. سابيروۆقا، شارۋاشىلىق مەڭگەرۋشىسى ا. ءالجانوۆاعا، باس بۋحالتەر م. دۇيسەنعاليەۆاعا جانە كاسىپكەر ا. ەراليەۆاعا قاتىستى ۇكىم شىعاردى. سوتتالۋشىلار زاڭناما تالاپتارىن بۇزا وتىرىپ جاسالعان شارتتار شەڭبەرىندە ءىس جۇزىندە قىزمەت كورسەتۋسىز كاسىپكەرگە 231,8 ميلليون تەڭگە سوماسىندا اقشا اۋدارعان. ولار قاراجات جىمقىرعانى ءۇشىن كىنالى دەپ تانىلدى. سوت ۇكىمىمەن ولارعا 5 جىلدان 7 جىلعا دەيىنگى مەرزىمگە باس بوستاندىعىنان ايىرۋ جازاسى تاعايىندالدى. ەمحانا باسشىسى ە. سابيروۆ ءومىر بويى مەملەكەتتىك قىزمەتتە جانە كۆازيمەملەكەتتىك سەكتور سۋبەكتىلەرىندە قىزمەت اتقارۋ، ال، ءالجانوۆا، دۇيسەنعاليەۆا جانە ەراليەۆا مەملەكەتتىك ۇيىمداردا 7 جىل مەرزىمگە ماتەريالدىق-جاۋاپتى لاۋازىمداردى اتقارۋ قۇقىعىنان ايىرىلدى»، - دەپ حابارلادى اگەنتتىكتىڭ باسپا ءسوز قىزمەتى.

سوت ۇكىمى زاڭدى كۇشىنە ەنگەن جوق.

ەسكە سالا كەتەلىك، بۇدان بۇرىن اتىراۋدا مەديتسينا مەكەمەمەلەرىنىڭ ديرەكتورلارى ج و و-دا وقۋ ءۇشىن بيۋدجەتتىڭ 10,5 ميلليون تەڭگەسىن جۇمساعانىن حابارلاعان بولاتىنبىز.

اۆتور
جولداسبەك شوپەعۇل