ەمحانالاردا جالعان قۇجات تولتىرىلماس ءۇشىن ارنايى جۇيە ەنگىزىلەدى

استانا. KAZINFORM - دەنساۋلىق ساقتاۋ ءمينيسترى اقمارال ءالنازاروۆا «24KZ» ەلەارناسىنا بەرگەن سۇحباتىندا دەنساۋلىق ساقتاۋ جۇيەسىندەگى قىزمەتتى بۇرامالاۋدىڭ (جالعان قۇجات تولتىرۋ) الدىن الۋ بويىنشا قابىلدانىپ جاتقان جاڭا شارالار تۋرالى باياندادى.

جالعان قۇجاتتارمەن كۇرەستەگى نەگىزگى قۇرال - ناۋقاستارعا مەديتسينالىق قىزمەتتەردى كورسەتۋ فاكتىسىن راستايتىن Face-ID ەنگىزۋدى قوسا العاندا باسقا دا تسيفرلىق تەحنولوگيالار بولماق.

مينيسترلىك استاناداعى باستاپقى مەديتسينالىق-سانيتارلىق كومەك بويىنشا رەسپۋبليكالىق ەمحانا بازاسىندا پيلوتتىق جوبانى ىسكە قوستى. جوبا اياسىندا ناۋقاستار Face-ID جانە ۆەب-كامەرا كومەگىمەن جەكە باسىنىڭ سايكەستىگىن انىقتايتىن بولادى، بۇل ولارعا كورسەتىلگەن قىزمەت تۋرالى دەرەكتەردىڭ بۇرمالانۋىنا جول بەرمەۋگە سەپتىك ەتەدى.

«وسى جىلدىڭ سوڭىنا دەيىن ءبىز استانادا پيلوتتىق جوبانى ىسكە اسىرامىز، ال 1-قاڭتاردان باستاپ ونى بۇكىل رەسپۋبليكا بويىنشا اۋقىمىن كەڭەيتىپ تاراتۋدى جوسپارلاپ وتىرمىز. بۇل جالعان قۇجات تولتىرۋدى تۇبىرىمەن جوق قىلاتىن ءتيىمدى قۇرال بولادى»، - دەپ اتاپ ءوتتى اقمارال ءالنازاروۆا.

بيومەتريالىق جەكە باس سايكەستىگىن انىقتاۋ جۇيەسى كورسەتىلگەن قىزمەتتەردى ناقتى تىركەۋدى قامتاماسىز ەتەدى، بۇل ناۋقاستاردىڭ دارىگەرگە قارالۋى تۋرالى جالعان ەسەپ جازۋعا مۇمكىندىك بەرمەيدى، سايكەسىنشە بيۋدجەت قارجىسىنىڭ دا، ساقتاندىرىلعان ازاماتتاردىڭ جارناسىنىڭ دا ماقساتسىز جۇمسالۋىنىڭ الدىن الادى.