مەشىتتە ناماز ۋاقىتىندا ەر ادامدى «ءامين» دەپ ايتقانى ءۇشىن ۇرىپ جىبەرگەن

сешіт
Фото: видеодан кадр

شىمكەنت. KAZINFORM - شىمكەنتتە مەشىتتەردىڭ بىرىندە ءبىر توپ ازامات يمامنىڭ ەسكەرتۋىنە قاراماستان جاماعات نامازىن بۇزعان. ولار وزگە وڭىردەن كەلگەن.

وقيعا 12-مامىردا كەشكى اقشام نامازى كەزىندە بولعان. بۇل ءساتتىڭ ۆيدەوسى جەلىدە پايدا بولدى. وندا وزگەلەرمەن قاتار ناماز وقىپ تۇرعان ەر ادامدى ەكىنشىسى جۇدىرىقپەن ۇرىپ جىبەرگەنىن بايقاۋعا بولادى.

قازاقستان مۇسىلماندارى ءدىني باسقارماسىنىڭ مالىمەتىنشە، وزگە ءمازھابتا ناماز وقىعان ءبىر توپ ادام جاماعات پەن يمامنىڭ وتىنىشىنە قۇلاق اسپاي، مەشىت ەرەجەسىن ورەسكەل بۇزعان.

ناماز كەزىندە «ءامين» دۇعاسىن قاتتى داۋىسپەن ايتقان جانداردىڭ ارەكەتىنە توزبەگەن مەشىتكە تۇراقتى كەلۋشى ءبىر ازامات ولاردىڭ بىرىنە قول جۇمساعان. ناتيجەسىندە يمام جاماعات نامازىن توقتاتۋعا ءماجبۇر بولعان.

«وقىس وقيعا دەر كەزىندە توقتاتىلىپ، پوليتسيا قىزمەتكەرلەرى ءتيىستى جۇمىس جۇرگىزگەن. قازاقستان مۇسىلماندارى ءدىني باسقارماسى مەشىتكە كەلۋشى جاماعاتتى مەشىت ەرەجەسىنە باعىنۋعا، سونىمەن قاتار قۇلشىلىق ۇيىندە سابىر ساقتاپ، كوركەم مىنەز تانىتۋعا شاقىرادى»، - دەلىنگەن ق م د ب مالىمەتىندە.

ايتا كەتسەك، ق م د ب بەكىتكەن «مەشىت ەرەجەسى» بويىنشا قازاقستان مۇسىلماندارىنىڭ اۋىزبىرشىلىگى مەن ءبىرتۇتاستىعىن قامتاماسىز ەتۋ ءۇشىن ناماز بەن ءدىني راسىمدەر ءابۋ حانيفا ءمازھابى بويىنشا ورىندالادى.

سوڭعى جاڭالىقتار