ەمشەك ءسۇتىنىڭ جەكە بانكى: ەلىمىزدە العاش رەت شالا تۋعان بالالارعا ءتيىمدى جوبا ىسكە اسپاق

الماتى. KAZINFORM - الماتى قالاسىنىڭ پەريناتولوگيا جانە بالالار كارديوحيرۋرگياسى ورتالىعىندا قازاقستان رەسپۋبليكاسىندا العاش رەت جاڭا جوبا ىسكە قوسىلدى. بۇل تۋرالى ق ر دەنساۋلىق ساقتاۋ مينيسترلىگى ءمالىم ەتتى.

ماڭىزدى الەۋمەتتىك جوبانى ق ر دەنساۋلىق ساقتاۋ مينيسترلىگى مەن AYALA قايىرىمدىلىق قورى ىسكە اسىرىپ وتىر. تابيعي تاماقتانۋدى تىكەلەي اناسىنان الا المايتىن ەرەكشە مەديتسينالىق قاجەتتىلىكتەرى بار شالا تۋعان جانە جاڭا تۋعان نارەستەلەردىڭ ءومىرىن ساقتاۋعا باعىتتالعان جوبا.

- ەمشەك ءسۇتىنىڭ جەكە بانكى - بۇل قارقىندى تەراپيانى قاجەت ەتەتىن جاڭا تۋعان نارەستەلەردى قولداۋعا باعىتتالعان ماڭىزدى باستاما. اۋرۋحانا جاعدايىندا، نارەستە ءارتۇرلى سەبەپتەرمەن اناسىنان ەمشەك ءسۇتىن الا الماعان كەزدە (مىسالى، قيىن بوسانۋ كەزىندەگى مەديتسينالىق كورسەتىلىمدەرگە بايلانىستى)، مۇنداي بانك تاپتىرماس رەسۋرسقا اينالادى. رەانيماتسياداعى جاڭا تۋعان نارەستەلەرىنەن ءماجبۇرلى تۇردە بولىنگەن انالارعا قولداۋ كورسەتۋ وتە ماڭىزدى. ەمشەك ءسۇتىن قاۋىپسىز ساۋۋ جانە ساقتاۋ پروتسەسىن ۇيىمداستىرۋ نارەستەلەردى قۇنارلى تاماقپەن قامتاماسىز ەتىپ قانا قويمايدى، سونىمەن قاتار لاكتاتسيانى ساقتاۋعا، انالارداعى سترەستى ازايتۋعا جانە اۋىر، قيىن بوسانعاننان كەيىن دە بالامەن بايلانىسىن نىعايتۋعا كومەكتەسەدى، - دەلىنگەن حابارلامادا.

ەمشەك ءسۇتىنىڭ جەكە بانكىن اشۋ - نەوناتالدىق قىزمەتتى جەتىلدىرۋدەگى وتە ماڭىزدى قادام

ەمشەك ءسۇتىن ساۋۋ مەيىرگەردىڭ باقىلاۋىمەن مىندەتتى تاڭبالانۋى بار ستەريلدى جەكە ىدىستاردا (ساۋۋ كۇنى مەن ۋاقىتى) جۇزەگە اسىرىلادى. جەكە جانە كلينيكالىق ەمشەك سورعىلارىن پايدالانۋعا رۇقسات ەتىلەدى. بارلىق ءىس-شارالار سانيتاريالىق-گيگيەنالىق نورمالاردى ساقتاي وتىرىپ جۇرگىزىلەدى. بانك ستەريلدى ىدىستارعا جينالعان جانە ەمشەك سۇتىمەن قورەكتەندىرۋ مۇمكىن بولماعان كەزدە بالانى تاماقتاندىرۋ ءۇشىن تومەن تەمپەراتۋرادا ساقتالاتىن ساۋىلعان ءسۇت قورى بولىپ تابىلادى.

مۇندا سالقىنداتىلعان (4 ± 2 گرادۋستىق تەمپەراتۋرادا ساقتالعان) جانە مۇزداتىلعان (18-…20- گرادۋستىق تەمپەراتۋرادا) ساۋىلعان تابيعي (شيكى) ءسۇتتى ساقتاۋعا بولادى.

- بولاشاقتا دەنساۋلىق ساقتاۋ مينيسترلىگى جوعارى قاۋىپتى فاكتورلارى بار جۇكتى ايەلدەر كەلەتىن جانە شالا تۋعان جانە سالماعى از بالالار تۋاتىن ەلدىڭ ءاربىر 3-دەڭگەيدەگى پەريناتالدىق ورتالىعىندا وسىنداي بانكتەر اشۋدى جوسپارلاپ وتىر. ەمشەك ءسۇتى جاڭا تۋعان نارەستەلەر ءۇشىن وڭتايلى قورەكتەندىرۋ رەتىندە تانىلادى: ونىڭ قۇرامىندا بالانىڭ تولىق وسۋىنە، دامۋىنا جانە تۇراقتى يممۋنيتەتىن قالىپتاستىرۋعا قاجەتتى قورەكتىك زاتتار مەن فەرمەنتتەردىڭ تاماشا تەڭدەستىرىلگەن كەشەنى بار. ونىڭ بىرەگەي قۇرامى ينفەكتسيالىق اۋرۋلاردان قورعاۋدى قامتاماسىز ەتەدى جانە ۇزاق مەرزىمدى دەنساۋلىقتى قالىپتاستىرۋعا ىقپال ەتەدى، - دەپ حابارلادى ۆەدومستۆودان.

بۇل جوبا د د ۇ باستاماسى بويىنشا جىل بويى وتكىزىلەتىن دەنساۋلىق كۇنىنە ارنالعان ءىس-شارالار شەڭبەرىندە: «سالاماتتى ءومىردىڭ باستالۋى - بەرەكەلى بولاشاقتىڭ كەپىلى» ۇرانىمەن ىسكە اسىرىلدى. جوبا سونىمەن قاتار انالار مەن جاڭا تۋعان نارەستەلەردىڭ دەنساۋلىعىن ساقتاۋ جونىندەگى حالىقارالىق اقپاراتتىق ناۋقاننىڭ بولىگى بولدى.

بۇعان دەيىن حابارلانعانداي، س ق و-دا 23 مىڭنان استام ايەل پرەگراۆيدالدى دايىندىقتان وتەدى.