مەديتسينالىق كوللەدجدەرگە ءتۇسۋ ءۇشىن ءتۇسۋ ەمتيحاندارى ەنگىزىلدى

استانا. KAZINFORM - مەديتسينالىق كوللەدجدەرگە ءتۇسۋ ءۇشىن تاڭدالعان ماماندىققا بايلانىستى ەكى ءپاننىڭ بىرەۋى بويىنشا ارنايى ەمتيحان ەنگىزىلدى. ەندى بۇل ستوماتولوگيا مەن ورتوپەديادان باسقا بارلىق مەديتسينالىق ماماندىقتارعا تۇسۋشىلەر ءۇشىن مىندەتتى بولادى (وقۋ تۇرىنە قاراماستان - 9 نەمەسە 11-سىنىپتاردىڭ نەگىزىندە).

ەمتيحان بەيىندىك پاندەر بويىنشا بازالىق ءبىلىمدى، سونداي-اق تالاپكەردىڭ موتيۆاتسيالىق دەڭگەيىن باعالاۋدى قامتيدى.

- مەملەكەت باسشىسى جاريالاعان جۇمىسشى ماماندىقتار جىلى شەڭبەرىندە ءبىز ورتا مەديتسينالىق ءبىلىم الاتىن مامانداردى دايارلاۋ ساپاسىنا قويىلاتىن تالاپتاردى ارتتىرامىز. موتيۆاتسيا مەن دايىندىقتى باعالاۋدىڭ ءبىرىڭعاي ءتاسىلى ەسەبىنەن ءتۇسۋ كەزىندە ادىلەتتىلىك قامتاماسىز ەتىلەدى. بۇل قوعامنىڭ مەديتسينالىق كادرلاردى دايارلاۋ جۇيەسىنە دەگەن سەنىمىن ارتتىرۋدىڭ العاشقى قادامى، - دەپ اتاپ ءوتتى دەنساۋلىق ساقتاۋ مينيسترلىگى.

دەنساۋلىق ساقتاۋ مينيسترلىگى وقۋ-اعارتۋ مينيسترلىگىمەن بىرلەسىپ تالاپكەرلەر مەن ولاردىڭ اتا-انالارىن قابىلداۋدىڭ جاڭا شارتتارىمەن مۇقيات تانىسۋعا جانە ارنايى ەمتيحانعا الدىن الا دايىندالۋعا شاقىرادى.

قوسىمشا اقپارات، تاپسىرما ۇلگىلەرى، ەمتيحان كەستەسى جانە ءوتۋ ەرەجەلەرى رەسمي سايتتاردا، وقۋ ورىندارىنىڭ اقپاراتتىق جۇيەلەرىندە قولجەتىمدى.

ايتا كەتەلىك الەۋمەتتىك ماڭىزى بار پرەپاراتتاردىڭ باعاسى تومەندەۋى مۇمكىن ەكەنىن جازعان ەدىك.