«مەدەۋ» مۇز ايدىنى قالاي جاڭارتىلادى
الماتى. KAZINFORM - «مەدەۋ» مۇز ايدىنىنىڭ اينالاسىندا جاڭا اللەيالار مەن سەرۋەندەۋگە ارنالعان جولدار پايدا بولادى.

الماتى سپورت نىساندارىن باسقارۋ جونىندەگى ديرەكتسياسىنىڭ مالىمەتىنشە، 2023 -جىلى «مەدەۋ» مۇز ايدىنى مەن ونىڭ ينجەنەرلىك جەلىلەرىنىڭ تەحنيكالىق جاعدايىن تەكسەرۋ جانە باعالاۋ جۇمىستارى جۇرگىزىلدى. ساراپتاما قورىتىندىسىنا سايكەس، قازىرگى ۋاقىتتا مۇز ايدىنى جاپپاي سىرعاناۋ ءۇشىن قاۋىپسىزدىك تالاپتارىنا ساي كەلەدى.
الماتى اكىمدىگى «مەدەۋ» اۋماعىن جاڭعىرتۋ بويىنشا ءبىرقاتار جۇمىستار جۇرگىزىلەتىنىن حابارلادى. ولار:
مۇز ايدىنىنىڭ باتىس بولىگىندە سەرۋەندەۋ اللەياسىن قۇرۋ
ايدىن اينالاسىندا جاياۋ جۇرگىنشىلەرگە ارنالعان باسپالداقتار ورناتۋ
وڭتۇستىك بەتكەيدە، ياعني ەسەنتاي وزەنىنىڭ وڭ جاعالاۋى بويىمەن كوركەيتۋ جۇمىستارىن جۇرگىزۋ
مۇمكىندىگى شەكتەۋلى ازاماتتارعا ىڭعايلى بولۋى ءۇشىن وڭتۇستىك- شىعىس جانە وڭتۇستىك- باتىس بولىگىندە ەكى جەدەل ساتى ورناتۋ كوزدەلگەن.
ودان بولەك ينجەنەرلىك جۇيەلەردى جاڭعىرتۋ جۇمىستارى بارىسىندا مۇز جابىنىن سۋىتۋ جۇيەسىن جاڭارتۋ، قۇبىر جەلىلەرىن تولىق اۋىستىرا وتىرىپ، تەحنولوگيالىق تاقتانى جاڭارتۋ، جىلىتۋ جۇيەسىن گازعا اۋىستىرۋ، جىلىتۋ جانە كورەرمەندەرگە ارنالعان ورىنداردى جىلىتۋ جۇيەسىن جاڭعىرتۋ جانە كەلۋشىلەرگە قولايلى جاعداي جاساۋ ءۇشىن ينفراقۇرىلىمدىق ەلەمەنتتەردى جاڭارتۋ جۇمىستارى جوسپارلانعان. سونىمەن قاتار «مەدەۋ» قوناق ءۇيىن تولىق رەكونسترۋكتسيالاۋ جوباعا ەنگەن.
- رەكونسترۋكتسيالاۋ بارىسىندا «مەدەۋ» مۇز ايدىنىنىڭ تاريحي كەلبەتى مەن مادەني مۇراسىن ساقتاۋ باستى باسىمدىق بولىپ قالا بەرەدى، - دەپ حابارلادى اكىمدىكتەن.
ەسكە سالايىق، وتكەن جىلى الماتى اكىمى ەربولات دوسايەۆ «مەدەۋ» مۇز ايدىنى مودەرنيزاتسيادان وتەتىنىن ايتقان بولاتىن.