مۇعالىمدەردىڭ ەڭبەك دەمالىسى 56 كۇنگە دەيىن ۇزارتىلدى
استانا. KAZINFORM - استاناداعى ورتالىق كوممۋنيكاتسيالار قىزمەتىندە وتكەن بريفينگتە وقۋ-اعارتۋ ۆيتسە-ءمينيسترى شىنار اقپاروۆا پەداگوگتەردى اتتەستاتتاۋ قاعيدالارىنا ەنگىزىلەتىن وزگەرىستەردىڭ ءمانىن ءتۇسىندىردى.
بريفينگ بارىسىندا ۆيتسە-مينيستر پەداگوگ مارتەبەسىن ارتتىرۋ باعىتىنداعى رەفورمالار جۇيەلى تۇردە جۇزەگە اسىرىلىپ كەلە جاتقانىن اتاپ ءوتتى. ونىڭ ايتۋىنشا، «پەداگوگ مارتەبەسى تۋرالى» زاڭ قابىلدانعاننان بەرى مەملەكەت باسشىسى قاسىم-جومارت توقايەۆ ايقىنداعان باسىمدىقتارعا سايكەس اۋقىمدى جۇمىستار جۇرگىزىلگەن.
بۇل رەفورمالار ءبىلىم بەرۋ جۇيەسىن ساپالىق تۇرعىدان جاڭعىرتىپ قانا قويماي، پەداگوگ ماماندىعىنىڭ قوعامداعى بەدەلىن نىعايتۋعا نەگىز بولدى، - دەدى شىنار اقپاروۆا.
ۆيتسە-ءمينيستردىڭ مالىمەتىنشە، جۇرگىزىلگەن ساياساتتىڭ ناتيجەسى ناقتى كورسەتكىشتەر ارقىلى دالەلدەنگەن. 2023-جىلعى زەرتتەۋ قورىتىندىسى پەداگوگ ەڭبەگىنىڭ قوعامدىق ماڭىزدىلىعى ايتارلىقتاي ارتقانىن كورسەتەدى. سونىمەن قاتار مۇعالىمدەردىڭ جالاقىعا قاناعاتتانۋ دەڭگەيى بويىنشا قازاقستان العاشقى بەستىككە ەنگەن.
سونداي-اق مۇعالىمدەردىڭ جۇكتەمەسىن ازايتۋ جانە اكىمشىلىك راسىمدەردى قىسقارتۋ ولاردىڭ نەگىزگى كاسىبي قىزمەتىنە كوبىرەك كوڭىل بولۋىنە مۇمكىندىك بەرگەن.
پەداگوگ كادرلاردىڭ ساپالىق قۇرامى دا جاقسارىپ كەلەدى. ماگيستر دارەجەسى بار مامانداردىڭ ۇلەسى تۇراقتى ءوسىپ، بۇگىندە 11 پايىزعا جەتكەن.
الەۋمەتتىك قولداۋ شارالارىنىڭ ناتيجەسىندە مەكتەپ مۇعالىمدەرىنىڭ جالاقىسى ەكى ەسەگە ارتسا، مەكتەپكە دەيىنگى ۇيىم پەداگوگتارىنىڭ ەڭبەكاقىسى 30 پايىزعا وسكەن. قوسىمشا تولەمدەر ەنگىزىلىپ، ەڭبەك دەمالىسى 56 كۇنگە دەيىن ۇزارتىلعان.
وسى وزگەرىستەردىڭ ناتيجەسىندە قازاقستاندىق پەداگوگتەردىڭ 95 پايىزى ءوز كاسىبىنە قاناعاتتاناتىنىن بىلدىرگەن.
وسى وڭ ديناميكانى ەسكەرە وتىرىپ، ءبىلىم بەرۋ سالاسىنداعى رەفورمالار جاڭا مازمۇندىق كەزەڭگە وتكەن. بۇل رەتتە پەداگوگتەردى اتتەستاتتاۋ جۇيەسىن جەتىلدىرۋ ماسەلەسى ەرەكشە ماڭىزعا يە.
اتتەستاتتاۋ - ءاربىر پەداگوگتىڭ كاسىبي دەڭگەيىنە تىكەلەي اسەر ەتەتىن ماڭىزدى تەتىك. سوندىقتان بۇل باعىتتاعى وزگەرىستەر ءبىلىم بەرۋ ساپاسىن ارتتىرۋعا باعىتتالعان، - دەدى ۆيتسە-مينيستر.
ونىڭ ايتۋىنشا، جاڭا وزگەرىستەر پەداگوگتەردىڭ كاسىبي بىلىكتىلىگىن باعالاۋ پروتسەسىن جەتىلدىرىپ، ونى اشىق ءارى ءادىل ەتۋگە مۇمكىندىك بەرەدى.
سونداي-اق كاسىبي ورتادا بۇل وزگەرىستەرگە قاتىستى ءتۇرلى پىكىرلەردىڭ بولۋى قالىپتى جاعداي ەكەنى اتاپ ءوتىلدى. مينيسترلىك بارلىق ۇسىنىستاردى ەسكەرە وتىرىپ، رەفورمالاردى كەزەڭ-كەزەڭىمەن ەنگىزۋدى جوسپارلاپ وتىر.
بۇعان دەيىن قازاقستاندا پەداگوگتەردى اتتەستاتسيالاۋ جۇيەسىنە قاتىستى ماڭىزدى وزگەرىس ەنگىزىلگەن ەدى.
