مۇعالىمدەر مەن اتا-انالاردىڭ سويلەسكەن ءساتى قۇرىلعىعا جازىلادى
سەۋلدىڭ بارلىق باستاۋىش مەكتەبىندە اتا-انالارمەن سويلەسكەن ءساتتى جازىپ وتىراتىن قۇرىلعىلار ورناتىلادى، دەپ حابارلايدى قازاقپارات Yonhap اگەنتتىگىنە سىلتەمە جاساپ.
بۇدان بولەك، باستاۋىش جانە ورتا مەكتەپتەردە مۇعالىمدەردىڭ اتىنان اتا-انالاردىڭ شاعىمىن قارايتىن چات-بوت ەنگىزىلەدى، دەپ حابارلادى سەۋل ءبىلىم ءبولىمىنىڭ باسشىسى سەيسەنبىدە.
بۇل - وڭتۇستىك كورەيا مەكتەپتەرىندە مۇعالىمدەردىڭ ءوز-وزىنە قول جۇمساۋىنان كەيىن باسقا مەكتەپتەردەگى اتا-انالار تاراپىنان جاسالاتىن بۋللينگكە جول بەرمەۋ ءۇشىن جاسالعان شارالاردىڭ ءبىرى. جوسپارعا سايكەس، جەلتوقسان ايىندا اتا-انالاردىڭ شاعىمىن تاۋلىك بويى قاراستىراتىن پيلوتتىق چات-بوت قىزمەتى ىسكە قوسىلادى. ال ناۋرىز ايىندا ەل استاناسىنىڭ بارلىق باستاۋىش جانە ورتا مەكتەبىنە ەنگىزىلمەك.
جەكە نازار اۋدارۋدى قاجەت ەتەتىن اتا-انالاردىڭ شاعىمى ءبىلىم بەرۋ باسقارماسىنىڭ بايلانىس ورتالىعىنا نەمەسە جەكە چات قىزمەتىنە جىبەرىلەدى.
2024-جىلدىڭ سوڭىنا قاراي سەۋلدەگى بارلىق باستاۋىش مەكتەپتە تەلەفون جازۋ قۇرىلعىلارى ورناتىلادى جانە اتا-انالار كەلەسى قىركۇيەك ايىنان باستاپ مۇعالىمدەرمەن كەزدەسۋ ءۇشىن موبيلدى قوسىمشا ارقىلى الدىن الا رۇقسات الۋى قاجەت. سونىمەن قاتار اتا-انالار تاراپىنان كەز كەلگەن سوزبەن بالاعاتتاۋ نەمەسە زورلىق-زومبىلىق كورسەتۋ جاعدايىن بولدىرماۋ ءۇشىن مەكتەپتەردىڭ ءماجىلىس زالدارىندا بەينەباقىلاۋ جۇيەسى دە ورناتىلادى.
وسى شارالارعا سايكەس سەۋل ءبىلىم باسقارماسى زاڭگەرلىك قولداۋ جۇيەسىن ەنگىزۋدى جوسپارلاپ وتىر، ونىڭ اياسىندا ءار مەكتەپكە ادۆوكات تاعايىندالادى. ول وقۋشىلارعا قاتىگەزدىك جاسادى دەپ ايىپتالعان مۇعالىمدەرگە زاڭگەرلىك كەڭەس بەرەدى.
قىركۇيەك ايىنىڭ باسىندا بۇكىل وڭتۇستىك كورەيادا جاپپاي ميتينگىلەر ءوتتى. 120 مىڭعا جۋىق مەكتەپ مۇعالىمى اتا-انالاردىڭ قورقىتۋىنان كەيىن ءوز-وزىنە قول جۇمساعان ارىپتەستەرىن جوقتاۋ ءۇشىن كوشەگە شىققان.
شەرۋشىلەردىڭ ماقساتى - بيلىك وكىلدەرىن الداعى ۋاقىتتا وسىنداي قايعىلى وقيعالاردىڭ الدىن الۋ ءۇشىن شارا قولدانۋعا شاقىرۋ.