مۇعالىمدەرگە ارنالعان جاڭا باعدارلامالار ازىرلەنىپ جاتىر

Фото: freepik.com
Фото: freepik.com

استانا. KAZINFORM - پەداگوگتەردى اتتەستاتتاۋدان وتكىزۋ قاعيدالارى مەن شارتتارى قايتا قارالىپ جاتىر. بۇل جايىندا وقۋ-اعارتۋ مينيسترلىگىنەن ءمالىم ەتتى.

«پرەزيدەنتتىڭ 2023-جىلدىڭ 5- قازانداعى رەسپۋبليكالىق پەداگوگتەر سەزىندە بەرگەن تاپسىرمالارىن ورىنداۋ ماقساتىندا قازىرگى ۋاقىتتا پەداگوگتەردى اتتەستاتتاۋدان وتكىزۋ قاعيدالارى مەن شارتتارى قايتا قارالىپ جاتىر. اتتەستاتتاۋ قاعيدالارىنىڭ جوباسىندا وقىتۋ مەن وقىتۋ پراكتيكاسىنا نەگىزدەلگەن پەداگوگتەردى باعالاۋ كوزدەلەدى. بۇدان باسقا، پەداگوگتەردىڭ، باسشىلاردىڭ، ادىسكەرلەردىڭ، اتتەستاتتاۋ كوميسسياسى مۇشەلەرىنىڭ ساباقتاردى باقىلاۋى قاراستىرىلادى. قاعيدالار جوباسىندا وقىتۋ ساپاسىن ارتتىرۋ ارقىلى ناتيجە بەرەتىن پەداگوگتىڭ ءتيىمدى تاجىريبەسىنە نازار اۋدارىلادى. بۇگىندە ءبىلىم بەرۋ ۇيىمدارىنىڭ پەداگوگتەرى كەمىندە ءۇش جىلدا ءبىر رەت بىلىكتىلىكتى ارتتىرۋ كۋرستارىنان وتەدى. قازىرگى ۋاقىتتا كۋرستىق دايارلىق تاسىلدەرىن جاڭارتۋ بويىنشا پەداگوگتەردىڭ بىلىكتىلىك ساناتتارىنا سايكەس دەڭگەيلىك ءبىلىم بەرۋ باعدارلامالارى ازىرلەنۋدە»، - دەپ اتاپ وتەدى مينيسترلىكتەن اگەنتتىكتىڭ رەسمي ساۋالىنا وراي.

ۆەدومستۆونىڭ ناقتىلاۋىنشا، پەداگوگتەردىڭ كەلەسى دەڭگەيلەرىنە سايكەس وقىتۋدىڭ جاڭا ادىستەمەلەرىن مەڭگەرۋى مىناداي تاقىرىپتاردى قامتيدى:

* باستاۋىش (قاراپايىم) - وقىتۋدىڭ نەعۇرلىم ءتيىمدى ادىستەرىن، ءبىلىم الۋشىلاردىڭ وقۋ جەتىستىكتەرىن باعالاۋ تەتىكتەرىن يگەرۋ بويىنشا پەداگوگتەردىڭ كاسىبي قۇزىرەتتىلىكتەرىن قالىپتاستىرۋعا (پەداگوگ-تاعىلىمداماشىلار مەن پەداگوگتەرگە باعدارلانعان)؛

* جالعاستىرۋشى (ورتا) - ءبىلىم الۋشىلاردىڭ ءبىلىم جەتىستىكتەرى مونيتورينگىنىڭ ناتيجەلەرى (ب ب ج م) بويىنشا كورسەتكىشتەرى تومەن بولعان ءبىلىم الۋشىلارمەن جۇمىس ىستەۋگە (پەداگوگ-مودەراتورعا، پەداگوگ-ساراپشىعا باعدارلانعان)؛

* جەتىلدىرىلگەن (كۇردەلى) - ناقتى ءپاندى تەرەڭدەتىپ وقىتۋ جانە دارىندى ءبىلىم الۋشىلارمەن جۇمىس ادىستەرىن يگەرۋ بويىنشا پەداگوگتەردىڭ كاسىبي قۇزىرەتتىلىكتەرىن قالىپتاستىرۋعا باعىتتالعان (پەداگوگ-ساراپشىعا، پەداگوگ-زەرتتەۋشىگە جانە پەداگوگ-شەبەرگە باعدارلانعان).

«پەداگوگتەردىڭ بىلىكتىلىگىن ارتتىرۋ كۋرستارى باعدارلامالارىنىڭ مازمۇنى «پەداگوگ» كاسىبي ستاندارتىنا سايكەس پەداگوگيكالىق قىزمەتتىڭ بارلىق تۇرلەرىن ىسكە اسىرۋ ءۇشىن پەداگوگكە قاجەتتى پاندىك، پسيحولوگيالىق-پەداگوگيكالىق، الەۋمەتتىك، سيفرلىق جانە باسقا دا قۇزىرەتتەردىڭ وڭتايلى اراقاتىناسىن قامتيتىن بولادى. بۇدان باسقا، جەرگىلىكتى اتقارۋشى ورگاندار پەداگوگ كادرلارعا قاجەتتىلىكتى ەسكەرە وتىرىپ، پەداگوگتەردى دايارلاۋ، جۇمىسقا ورنالاستىرۋ، بىلىكتىلىگىن ارتتىرۋ، ادىستەمەلىك جانە الەۋمەتتىك قولداۋ جونىندەگى وڭىرلىك باعدارلامالاردى ازىرلەۋدە»، - دەدى مينيسترلىكتەن.

سوڭعى جاڭالىقتار