مايقايىڭداعى اپات: ويىق تۇبىنە دەيىن 40 مەتر جەردى قازۋ كەرەك
التىن كەنىشىندە جەر استىنا ءتۇسىپ كەتكەن اۆتوبۋسقا جەتۋ ءۇشىن اۋىر تەحنيكا جول سالۋدى جالعاستىرۋدا. شۇڭقىردىڭ تۇبىنە ءتۇسۋ ءۇشىن ءالى دە 40 مەتردەن استام جولدى قازۋ قاجەت، دەپ حابارلايدى Kazinform.
پاۆلودار وبلىسى اكىمىنىڭ باسپا ءسوز قىزمەتى حابارلاعانداي، «مايقايىڭ-التىن» ا ق- نىڭ التىن كەنىشى ماڭىنداعى اۆتوبۋس پەن 2 قۇتقارۋشىنى ىزدەستىرۋ جۇمىستارى توقتاۋسىز جالعاسىپ جاتىر.
«ارنايى تەحنيكانىڭ ويىق تۇبىنە دەيىن جەتۋى ءۇشىن وتكەلدى تەرەڭدەتۋ جۇمىستارى جۇرگىزىلۋدە. شۇڭقىردىڭ تۇبىنە دەيىن ءالى دە 40 مەتردەن استام جولدى قازۋ قاجەت. اۋىر تەحنيكا اسقان ساقتىقپەن ءارى قاۋىپسىزدىك شارالارىن ساقتاي وتىرىپ جۇمىس ىستەپ جاتىر. شۇڭقىردىڭ ءبۇيىر قابىرعالارىنىڭ قۇلاۋ قاۋپى بار. بارلىعى 90 مىڭ تەكشە مەتردەن استام توپىراق پەن تاۋ جىنىستارى شىعارىلدى. ىزدەستىرۋ جۇمىستارى جالعاسۋدا جانە تاۋلىك بويى جۇرگىزىلۋدە» دەپ حابارلاندى ءوڭىر باسشىسىنىڭ باسپا ءسوز قىزمەتىنەن.
ەسكە سالا كەتەيىك، 4- قاڭتار كۇنى «مايقايىڭ التىن» كەن ورنىندا ۇلكەن ويىق ماڭىنداعى توپىراق وپىرىلىپ، 4 ادام مىنگەن اۆتوبۋس جەردىڭ استىنا ءتۇسىپ كەتكەن بولاتىن.
