مايقايىڭداعى اپات: اۆتوبۋستىڭ شاناعى مەن قۇتقارۋشىلاردىڭ سومكەسى تابىلدى
استانا. KAZINFORM - ويىق تۇبىنە تۇسىرىلگەن شاعىن ەكسكاۆاتور جەر قازۋ جۇمىستارى بارىسىندا اۆتوبۋستىڭ شاناق بولىگىن تاپتى.
سونداي- اق توپىراق اراسىنان قۇتقارۋشىلاردىڭ جولساپار جۋرنالى مەن جۇمىس قۇجاتتارى سالىنعان سومكە شىققان.
وقيعا ورنىندا قۇرىلعان جەدەل شتاب وكىلدەرى حابارلاعانداي، بۇگىن ساعات 14.45 تە «مايقايىڭالتىن» ا ق اۋماعىنداعى وپىرىلعان شۇڭقىردىڭ تۇبىنە شاعىن كولەمدى ەكسكاۆاتور ءتۇسىرىلدى.
تەحنيكا شۇڭقىردىڭ ءبۇيىر قابىرعالارى قۇلاۋ ءقاۋپىن ەسكەرە وتىرىپ، جەر قازۋ جۇمىستارىن اسا ساقتىقپەن جۇرگىزگەن.
- جۇمىستاردى جۇرگىزۋ كەزىندە ىشىندە جۇمىس قۇجاتتارى مەن جولساپار جۋرنالى بار قۇتقارۋشىلار سومكەسى، سونداي- اق، مەملەكەتتىك تىركەۋ ءنومىرى بار اۆتوبۋستىڭ شاناق بولىگى تابىلدى. ىزدەستىرۋ ءالى دە جالعاسۋدا. اۆتوبۋستىڭ بولجامدى ورنالاسقان جەرىنە دەيىنگى توپىراق قازىپ قازىپ الىنعان سوڭ، ەكسكاۆاتوردىڭ جۇمىسى اياقتالادى. ماماندار جەر استىندا جاتقان اۆتوبۋستى جوعارى كوتەرۋ جۇمىستارىن باستايدى. ءبىز بۇل جۇمىستاردى بۇگىن-ەرتەڭ اياقتايمىز دەپ ۇمىتتەنەمىز،- دەلىنگەن پاۆلودار وبلىسى اكىمىنىڭ باسپا ءسوز قىزمەتى تاراتقان اقپاراتتا.
وسى ۋاقىتقا دەيىن بارلىعى 200 مىڭ توننادان استام توپىراق پەن تاۋ جىنىستارى شىعارىلعان. ىزدەستىرۋ جۇمىستارىنا 141 ادام، 50 بىرلىك تەحنيكا، 1 كينولوگيالىق توپ جانە 2 درون جۇمىلدىرىلعان.
