مايقايىڭدا قازا بولعان قۇتقارۋشىلاردىڭ وتباسىلارىنا ساقتاندىرۋ وتەماقىسى تولەنىپ، بانكتەگى قارىزدارى كەشىرىلەدى

مايقايىڭ
فوتو: facebook.com/a.baikhanov

پاۆلودار. KAZINFORM - بۇل تۋرالى پاۆلودار وبلىسىنىڭ اكىمى اسايىن بايحانوۆ Facebook-تەگى پاراقشاسىندا جازدى. مارقۇمداردىڭ وتباسىلارىنىڭ نەسيەلەرى مەن كوممۋنالدىق قارىزدارىن وتەۋدى دە جۇمىس بەرۋشى ءوز موينىنا الاتىنىن مالىمدەدى.

پاۆلودار وبلىسىنىڭ اكىمى اسايىن بايحانوۆ بۇگىن «مايقايىڭ التىن» ا ق تاۋ-كەن اۋماعىنداعى وپىرىلعان جەردە قازا بولعان قۇتقارۋشىلاردىڭ وتباسىلارىنا بارعان.

«بەردىبەك سارقىتتىڭ تۋعان-تۋىستارىمەن مايقايىڭداعى ۇيىندە كەزدەستىم، بۇعان دەيىن مەن مۇندا ونىڭ جەرلەۋ راسىمىندە بولعانمىن. مەنىڭ بۇگىنگى كەلۋىمنىڭ ماقساتى - قازا تاپقان قۇتقارۋشىلاردىڭ تۋىستارىنا ولاردى ەشكىم جالعىز قالدىرمايتىنىن جەتكىزۋ. ارينە، ەشقانداي قولداۋ سوزدەرى مەن تولەمدەر جاقىندارىڭىزدى قايتارمايدى. ءبىراق، ءبىز اۋماعىندا قايعىلى جاعداي ورىن العان «مايقايىڭ- التىن» ا ق-نان، مەملەكەتتەن جانە جۇمىس بەرۋشىدەن جان-جاقتى كومەك الۋ ءۇشىن قاجەتتىنىڭ ءبارىن جاساۋدامىز» دەپ جازدى اكىم.

«Майкаинзолото»
فوتو: facebook.com/a.baikhanov

بۇعان قوسا ول مارقۇم قۇتقارۋشى ولەگ ىشكيەۆيچتىڭ ەكىباستۇزدا تۇراتىن قىزىمەن دە سويلەسكەنىن جەتكىزدى. ءوڭىر باسشىلىعى جۇمىس بەرۋشى مەن «مايقايىڭ التىن» ا ق-نىڭ يانا مەن ونىڭ اعاسى الدىنداعى بارلىق مىندەتتەمەلەرىنىڭ ورىندالۋىن قاداعالايتىن بولادى. قازا بولعان جانداردىڭ وتباسىلارىنا كامەلەتكە تولماعان بالالاردىڭ بولۋى مەن ولاردىڭ جاسىنا بايلانىستى كاسىبي اسكەريلەندىرىلگەن اۆاريالىق-قۇتقارۋ قىزمەتتەرىنىڭ رەسپۋبليكالىق ورتالىق شتابىنان 5-10 جىل ءۇشىن ورتاشا ايلىق جالاقى مولشەرىندە ساقتاندىرۋ وتەماقىسى بەرىلەدى.

«مايقايىڭ التىن» ا ق بۇعان دەيىن بولگەن قاراجاتىن بىرنەشە ەسەگە ارتتىرادى، ال، جۇمىس بەرۋشى قازا تاپقانداردىڭ وتباسىلارىنىڭ نەسيەلەرى مەن كوممۋنالدىق قارىزدارىن وتەۋدى ءوز موينىنا الادى.

«وسىنداي كومەكتەر ىزدەستىرۋ جۇرگىزىلىپ جاتقان ەكى قۇتقارۋشىنىڭ دەنەلەرى تابىلعان نەمەسە ولاردى قايتىس بولدى دەپ تانىعان جاعدايدا ولاردىڭ وتباسىلارىنا دا كورسەتىلەدى. قارجىلاي كومەكتىڭ كولەمى تۋرالى اقپارات جۇرتشىلىققا بارلىق قاجەتتى راسىمدەر اياقتالعاننان كەيىن حابارلاناتىن بولادى» دەپ حابارلادى ا. بايحانوۆ.

ەسكە سالا كەتەيىك، مايقايىڭداعى اپاتتا قازا تاپقان قۇتقارۋشىنىڭ قىزى وتەماقىنىڭ دۇرىس تولەنبەگەنىنە نارازى ەكەنى تۋرالى حابارلانبىز.

سوڭعى جاڭالىقتار