مايقايىڭدا كوميسسيا قۇرىلىپ جاتىر: اۆتوبۋس قۇلاعان ويىقتاعى ىزدەستىرۋ جۇمىسى ودان ءارى جالعاسا ما

پاۆلودار. KAZINFORM - ارنايى سكانەر ويىق تۇبىندەگى تاۋ جىنىستارىنىڭ قۇرىلىمى وزگەرگەنىن ءارى جۇمسارىپ بارا جاتقانىن انىقتادى. ازىرشە ىزدەۋ- قۇتقارۋ جۇمىستارى تۇراقتى تۇردە جالعاسۋدا.

وڭىرلىك توتەنشە جاعدايلار دەپارتامەنتىنەن حابارلاعانداي، بۇگىن ماماندار گەولوگيالىق رادارمەن ويىق ءتۇبىن كەزەكتى رەت سكانەرلەگەن.

« گەولوگيالىق سكانەردەن الىنعان مالىمەتتەردى زەردەلەي كەلگەندە، شۇڭقىر تۇبىندەگى تاۋ جىنىستارىنىڭ قۇرىلىمى وزگەرىپ، بوساڭسي باستاعانى انىقتالدى. نىساننىڭ جانىندا جانە استىندا قۋىستار مەن بوس كەڭىستىكتەر بار. كەز كەلگەن ساتتە تاۋ جىنىستارى تومەن وپىرىلىپ ءتۇسىپ كەتۋى مۇمكىن. قازىرگى كۇنى ويىقتىڭ بارلىق پەريمەترىن تەكسەرىپ شىعۋعا ارنالعان كوميستسيا قۇرىلىپ جاتىر. كوميسسيا تاۋ ماسساسىن تولىقتاي بارلاپ، ىزدەستىرۋ جۇمىستارىن ءارى قاراي جالعاستىرۋ كەرەك پە، جوق پا، سونى انىقتايدى» دەپ مالىمدەدى توتەنشە جاعدايلار دەپارتامەنتىنىڭ باسپا ءسوز قىزمەتى.

بۇگىن اپات ورنىندا ەكسكۆاتور مەن ماماندار ادەتتەگىدەي رەجىمدە جۇمىس ىستەدى.

ەسكە سالا كەتەيىك، كەشە جۇمىستار ءجۇرىپ جاتقان جەردە تەرەڭ ويىق پايدا بولىپ، قۇتقارۋشىلاردىڭ جۇمىسى شۇعىل توقتاتىلدى.

ارادا كوپ ۇزاماي قۇتقارۋ شارالارى قايتا جالعاستى.