مايقايىڭعا حالىقارالىق قۇتقارۋشى شاقىرۋعا قاجەتتىلىك بولعان جوق - رومان سكليار

استانا. KAZINFORM - پرەمەر-ءمينيستردىڭ ورىنباسارى رومان سكليار مايقايىڭ كەن ورنىندا اۆتوبۋستىڭ قۇلاۋى تۋرالى ءوز پىكىرىن ءبىلدىردى.

4- قاڭتار كۇنى «مايقايىڭ التىن» كەن ورنىندا ۇلكەن ويىق ماڭىنداعى توپىراق وپىرىلىپ، 4 ادام مىنگەن اۆتوبۋس جەر استىنا ءتۇسىپ كەتكەن بولاتىن. ەكى ادام قايتىس بولىپ، ەكى ادام ءالى تابىلمادى.

ءبىر ايدان كەيىن توتەنشە جاعدايلار سالاسىنىڭ قىزمەتكەرلەرى اتالعان ۋچاسكەدە قۇتقارۋشىلار مەن ماماندار ءۇشىن ۇلكەن قاۋىپ ءتوندىرىپ تۇرعانىن ايتىپ، ىزدەستىرۋ-قۇتقارۋ جۇمىستارىن توقتاتتى.

«مايقايىڭعا حالىقارالىق قۇتقارۋشىلاردى تارتۋ قاجەتتىگى بولعان جوق. ويتكەنى مۇنداي تاجىريبە دە بولماعان. توتەنشە جاعدايلار مينيسترلىگى ويىققا قۇلاپ كەتكەن ءوز ارىپتەستەرىن قۇتقارۋ ءۇشىن بار كۇش-جىگەرىن سالدى. جۇمىسشىلارى قازا تاپقان ۇيىم دا قولدان كەلگەننىڭ ءبارىن جاسادى»، - دەدى رومان سكليار ۇكىمەت كۋلۋارىندا.

بۇگىن مايقايىڭ كەنىشى اۋماعىنداعى ىزدەستىرۋ جۇمىستارى قايتا جانداندى. ويىق تۇبىنە دەيىن تەحنيكالاردى جەتكىزۋگە مۇمكىندىك بەرەتىن قاۋىپسىز جول سالىنىپ بولعان سوڭ ىزدەستىرۋ-قۇتقارۋ قايتا جالعاساتىن بولادى.